Скопје, 1 декември 2024
ЦИВИЛ ја подобри и реактивира онлајн платформата за пријавување кршење човекови права, која овозможува безбедно и доверливо пријавување случаи на дискриминација, полициска бруталност, закани, притисоци, уцени или насилство од страна на службени лица, политички партии или групи.
Платформата е дизајнирана на тој начин што овозможува анонимност и доверливост, како и секогаш порано, овозможувајќи на граѓаните да пријавуваат без страв од последици. Граѓаните се охрабруваат да ги споделат своите искуства, што ќе помогне во следењето, документирањето и справувањето со повредите на основните човекови права.
Како функционира
- Формуларот е на македонски и албански. Пријавата може да биде на било кој од тие јазици;
- Задолжителни полиња во формуларот се описот, локацијата и датумот на инцидентот / случајот што се пријавува;
- Доколку постојат, пожелно е да се прикачат докази, како фотографии или видеа.
Лични податоци не се бараат освен ако пријавувачот не избере да ги внесе за понатамошна комуникација со организацијата. Секој извештај се третира со највисоко ниво на доверливост, така што имињата на лицата што пријавуваат нема да бидат споделени со јавноста или со било која институција или медиумите.
Зошто пријавувањето е важно
Со пријавување на повредите, се помагаат напорите да се открие и разобличи неправдата и да се засили борбата за заштита на човековите права. Придонесот на секој поединец е клучен чекор за одговорност и правда.
Како да се пристапи до формуларот
Формуларот е достапен на овој ЛИНК. Повеќе информации за оваа иницијатива може да се најдат на медиумската платформа на ЦИВИЛ, ЦивилМедиа на македонски, Drejt на албански и CivilToday на англиски.
„Придружете ни се во борбата за правда и човековото достоинство. Заедно можеме да направиме разлика“, повикува организацијата која оваа акција ја обновува на волонтерска основа, без финансиска поддршка од било каков донатор.
ЦИВИЛ е организација за човекови права, демократија, еднаквост, правда и правичност, основана пред 25 години, во 1999 година, како изворна граѓанска иницијатива што потекнува од граѓанките и граѓаните. Во својата 25-годишна историја, ЦИВИЛ стана една од најпознатите организации во земјата подеднакво почитувана и поддржана од сите заедници во земјата, за што сведочат бројните изјави (линк) од видни личности во општеството и политиката.
ЦИВИЛ
