Украина се подготвува за потенцијален наплив на руски напади темпиран на годишнината од војната , при што властите ги повикаа училиштата да одржуваат настава од далечина и ги повикуваат луѓето да избегнуваат учество во големи толпи.
Како што пренесува Њу Јорк Тајмс, училиштата ширум Украина биле советувани да се префрлат на далечинско учење до петок од страна на министерот за образование на земјата, Серхиј Шкарлет, кој рече дека руската историја на напади врз училишта и други центри за собирање на цивили, како што се станбените згради и болниците, ги става во опасност учениците.
Во јужниот украински пристанишен град Херсон, кој силите на Кијив го вратија во ноември, властите ги советуваа жителите да избегнуваат непотребни патувања надвор и побараа од хуманитарните групи да не поттикнуваат големи собири.
Во поширокиот регион Херсон се воведуваат дополнителни безбедносни мерки како подготовка за можна руска ескалација, соопшти регионалната државна администрација. Од четврток до недела, многу јавни институции ќе работат од далечина, а службениците за спроведување на законот ќе патролираат во областите каде што може да се соберат толпи.
Кијив вели дека Русија трпи големи загуби бидејќи ги уфрла неодамна мобилизираните трупи во битка, но Громов рече дека Москва користи подобро подготвени војници од редовните единици во веќе повеќемесечната битка за Бахмут.
Како што пренесува Индипендент, според украинската војска, Русија ги интензивира непријателствата во Украина една година по нејзината инвазија во намерен обид да ги исцрпи украинските сили.
Бригадниот генерал Олексеј Громов изјави дека Русија си поставила цел до лето да ја заземе целата територија што не ја контролира во двата региони што ја сочинуваат индустриската област Донбас во источна Украина.
Најжестоките борби останаа околу источниот град Бахмут, рече тој на воениот брифинг во пресрет на петочната годишнина од инвазијата на 24 февруари минатата година.
„Непријателот, имајќи предност во ресурсите на човечка мобилизација, намерно ги интензивира непријателствата во обид да ги исцрпи единиците на вооружените сили на Украина“, рече Громов. Краткорочно, целта на Кремљ е да ги заземе клучните населби во регионот на Доњецк, а во иднина да ги освои (сите) регионите Доњецк и Луганск пред летото.
Генералното собрание на ОН се очекува да гласа за резолуција со која се повикува Русија да ги повлече своите трупи од Украина и за мировен договор со кој се признава суверенитетот на Украина и се отфрлаат какви било територијални придобивки од Русија.
Папата Франциско ја нарече војната „апсурдна и сурова“ во неговите неделни забелешки.
„Она што е изградено на урнатини никогаш нема да биде вистинска победа“, рече тој, повикувајќи на почеток на мировни преговори.
Подготви: Д. Мишев
