Во замена за воена поддршка, Русија ѝ обезбедува на Северна Кореја ракетна и вселенска технологија, а постојат индиции дека ова може да вклучува и технологии поврзани со нуклеарно оружје или негово подобрување, изјави Олех Ивашченко, началник на Службата за надворешно разузнавање на Украина во ексклузивно интервју за Укринформ.
„Тие им обезбедуваат ракетна и вселенска технологија. Не ја исклучуваме можноста дека ова може да вклучува и технологии поврзани со нуклеарно оружје или негово подобрување“, рече тој.
Како што претходно беше објавено, Северна Кореја ја снабдува Русија со муниција, артилериски системи Коксан од 170 мм М1989, повеќекратни ракетни системи М1991 од 240 мм, како и воен персонал кој учествува во борбени операции заедно со руските сили.
Како одговор, до Врховната рада, украинскиот парламент, е поднесена нацрт-резолуција, со која се повикуваат меѓународните институции и националните парламенти да ја признаат Демократска Народна Република Кореја како држава агресор.
Службата за надворешно разузнавање на Украина не ја исклучува можноста кинеските државјани кои учествуваат во војната на страната на Русија да бидат претставници на кинеските разузнавачки служби, испратени да стекнат искуство во модерното војување, изјави Ивашченко во интервјуто.
„Во секоја земја, специјалните служби решаваат одредени задачи и не можеме да исклучиме дека станува збор за претставници [на специјалните служби] кои го усвојуваат искуството од модерното војување“, рече тој.
Според Ивашченко, Русите споделуваат воено знаење со Кинезите на различни нивоа – преку воена соработка, заедничко планирање и координација на ниво на штаб. Ова вклучува спроведување на заеднички воени вежби.
„Кинезите се поканети и да учествуваат во заеднички руско-белоруски воени маневри кои се закажани да се одржат на воени полигони во Белорусија и Русија. Токму за време на овие меѓународни настани за воена соработка се споделува искуство“, додаде тој.
Тој, исто така, нагласи дека Русија е домаќин на значителен број кинески државјани, како и на поединци од други земји, вклучувајќи ги и државите од Централна Азија.
Вкупно, приближно шест милиони странци привремено престојуваат во Русија.
„Ова се оние кои дојдоа во потрага по можности за работа, како и студенти од азиските и африканските земји. И тие, како и секој странец во Русија, би можеле да завршат во редовите на руските вооружени сили откако ќе извршат помали административни прекршоци или ќе бидат намамени со парична награда. Не ја исклучуваме оваа можност“, рече Ивашченко.
Според Ивашченко, Белорусија не поседува нуклеарно оружје – само свои системи за испорака.
„Носители на нуклеарно оружје се распоредени таму. Тоа е вистински факт. Има распоредени авиони, ракети Искандер. Но, во Белорусија нема распоредено нуклеарно оружје. Тоа е докажан факт“, нагласи тој во интервјуо.
Како одговор на дополнително прашање, Ивашченко потврди дека во Белорусија моментално нема нуклеарни боеви глави.
„Тие опремуваат складишта, се подготвуваат, градат. Лукашенко вели дека ќе распоредат Орешник [систем за балистички ракети со среден дострел] до крајот на годината. Но, ова е повеќе како желба. Засега, тие немаат ништо такво и веројатно нема да имаат“, додаде шефот на Службата за надворешно разузнавање.
Подготви: Д. Mишев
