Премиерот Димитар Ковачевски во гостување во информативниот магазин „Клик Плус“ на ТВ21 вели дека условите во кои се наоѓа Европа се најтешки после Втората светска војна.
„Ние мора да разбереме дека на 1.000 километри од овде се води војна која што од ден на ден сѐ повеќе ескалира, значи во Украина, која што ќе потрае и која што има неизвесен тек со оглед на тоа што сите гледаме дека веќе се зборува за можна употреба на нуклеарно оружје. Ако ја гледате изјавата на американскиот претседател, ако ги гледате изјавите кои што ги даваат руските званичници. Тоа сценарио може уште повеќе да ги усложни тие односи“ – вели премиерот Ковачевски.
Ковачевски вели дека токму поради ова економските услови за живот на граѓаните станале тешки.
„Цената на таа војна која што се води практично е зголемени цени на храна, зголемени цени на енергенси, зголемени цени на суровини, меѓутоа цената на зголемување на енергенсите е толку висока што таа веќе ги надминува во одредени производствени процеси цената на суровините“, вели Ковачевски.
Премиерот Ковачевски додаде дека се во постојан контакт со стопанските комори и врз основа на тоа направиле мерки уште пред почетокот на енергетската криза.