Вицепремиерот и министер за одбрана Радмила Шекеринска ќе биде одликувана со орден Командант на Националниот ред за заслуги на Франција. Високото одликување во име на Претседателот на Република Франција, на министерката Шекеринска ќе и биде врачено од министерот Женевјев Дариесек, Државен секретар на Вооружените сили на Франција, утревечер на прием во резиденцијата на Франција во Скопје.
Како што соопшти Министерството за одбрана, орденот „Командант на Националниот ред за заслуги на Франција“ се доделува за истакнати граѓански заслуги, а воспоставен е во 1963 година од Генералот Шарл Де Гол.
Министерката Шекеринска признанието го добива поради нејзиниот особен придонес во развојот на односите меѓу Македонија и Франција, како и поради нејзината посветеност во промовирање на европските граѓански вредности во Македонија.
Одликувањето, се додава, е признание за талентот, вредностите и исклучителната храброст на министерката Шекеринска, потенцираат од амбасадата на Франција, и потсетуваат дека за време на мандатот на Шекеринска како заменик на претседателот на владата задолжен за европски интеграции, во 2005-та, Македонија од Европскиот совет го доби статусот земја – кандидат за членство во ЕУ, што претставуваше голем чекор за Македонија и позитивен сигнал за другите земји од југоисточна Европа.
– Ова одликување за мене е голема чест и мотив да продолжам по патот што го одбрав – да и служам на мојата земја со сиот личен и професионален капацитет, сето свое знаење и енергија да ги употребам во борбата за она во што верувам – слобода, демократија, еднаквост, правда, напредок. Мојата цел е да придонесам колку што можам во зацврствувањето на европските вредности во мојата држава, Република Македонија, како рамноправна членка на НАТО и ЕУ, во име и за подобар живот на граѓаните. Припаѓам на влада која ја врати земјата на европската и евроатлантската патека, ве уверувам дека патот на интеграцијата успешно ќе го изодиме, рече министерката во пресрет на свеченоста на одликувањето, стои во соопштението.
Министерката Шекеринска е прв политичар од Македонија што од Република Франција добива признание од овој ранг.
Орденот Командант на Националниот ред за заслуги на Франција на министерката Шекеринска ќе и биде врачен утревечер во 20 часот, на прием организиран во нејзина чест во резиденцијата на Франција во Скопје, наведуваат од Министерството за одбрана. (МИА)
