ДУИ е во сериозна криза. Дури девет од 30 и неколкуте ограноци на партијата, на вонредни седници, заседаваа во текот на вчерашното попладне до длабоко во ноќта. Среде густиот чад од тврдо „Марлборо“, со нервозните звуци на малите лажички со кои го мешаа црниот чај во малите бардачиња, локалните „интегративци“ дојдоа до сериозни заклучоци на двете точки што ги имаа на дневен ред.
Заклучокот по првата точка се однесува на тоа дека еден тетовчанец, кому му предложија министерска функција во тукушто измисленото министерство за странски инвестиции и родова еднаквост, најдрско ја одбил великодушната понуда на лидерот Ахмети. Работните групи во локалните ограноци имаа лесна задача да срочат писмо со осуда на ваквата постапка што ја нарушува добрата партиска традиција на добивање министерски позиции во било која влада од своето основање до денес.
На дневен ред беше и темата за недоволната и неправичната застапеност на локалните ограноци на ДУИ во централната власт, на министерско ниво. Делегатите на деветте ограноци на ДУИ донесоа решение да му упатат ултиматум на својот долгогодишен лидер да издејствува нови девет министерски позиции во Владата на кои, правично, ќе распредели по еден министер од сите побунети ограноци.
Воедно, дел од говорниците на овие седници, потсетија дека мораат да бидат традиционално солидарни со своите браќа во другите органоци што, од различни причини, пред сѐ, поради сезонска работа во странство, не успеале да формулираат вакви и слични барања. Затоа, поголем дел од деветте побунети ограноци, додадоа и посебна белешка и со тоа ги проширија своите декларации со повик до Али Ахмети да најави и втора фаза на проширување со нови министерски функции, по завршувањето на сезонските ангажмани на нивните партиски браќа во странство.
Во завршните зборови, некои делегати прочитаа и неколку дополнителни барања за одредени привилегии кои природно им припаѓаат на министрите. На таа листа, меѓу другото, се најдоа и барања за службени возила, секретарки, патни трошоци, репрезентација, дискрециони права, апанажи, телохранители, асистентки и асистенти, помошници и советници од родното место и неколку други скромни привилегии што се во насока на квалитетно извршување на функциите.
Стручната аргументација на овие најнови, конструктивни барања на ДУИ, се заснова на една сериозна научна студија за доброто владеење, подготвена од струлен тим на еден од елитните приватни универзитети во земјата. Според таа научна студија, Северна Македонија е во тешки срања, па затоа ѝ требаат повеќе министерства. Компаративно, според студијата, Швајцарија е земја со малку проблеми, па затоа ѝ се потребни само седум министри во владата. Што се поголеми проблемите, толку повеќе министри се потребни за нивно решавање. Што се 26 министри во сегашниот состав на Владата? – се поставува принципиелното прашање во студијата. Со новите девет министри, Владата на Северна Македонија ќе брои 35 министри, што е донекаде гаранција дека земјата тргнала на добар пат, но ни оддалеку доволно за правична застапеност на сите ограноци на ДУИ.
Хасан Мубарак
специјален известувач од Грчец
