Владата на синоќешната седница усвои Предлог закон за изменување и дополнување на Законот за заштита на сведоци. Целта на оваа предложена законска измена е да се обезбедат услови за спроведување на Законот за Јавното обвинителство за гонење на кривични дела поврзани и кои произлегуваат од содржината на незаконското следење на комуникациите, соопшти владината прес-служба.
Владиниот кабинет донел одлука да му предложи на Собранието усвојување и на предлог закони за престанок на важењето на Законот за совет за утврдување на факти и покренување на постапка за утврдување одговорност за судија и за изменување и дополнување на Законот за Судски совет.
„Целта е престанување на важење на Законот за Советот за утврдување факти и покренување постапка за утврдување одговорност за судија и враќање на надлежноста за водење дисциплинска постапка на Судскиот совет на Република Македонија, водејќи сметка за дадените забелешки и напатствија од меѓународните институции во делот на реформите на правосудниот систем“, соопшти владината прес-служба по синоќешната седница на Владата.
Во образложението на Предлог законот се наведува дека праксата покажала оти формирање вакво професионално тело за покренување постапка за утврдување одговорност на судија не ја остварило целта на основањето, туку, напротив, било формирано без да се направи целосна анализа на недостатоците во Законот за судски совет што резултирало со негативен извештај од меѓународните институции, вклучувајки ги и забелешките од Венецијанската комисија.
Предложените измени и дополнувања на Законот за Судски совет се заради правните последици што ќе произлезат од предлогот за престанок на важењето на Законот за совет за утврдување факти и покренување постапка за утврдување одговорност за судија, како и заради укажувањата за неопходноста од законски измени кои на ова тело ќе му наложат поголема и неопходна транспарентност во работата на Судскиот советот, и заради постоечката законска одредба која на кандидатите за судии кои не беа избрани на огласот, им беше ускратено правото на жалба, информираат од Владата.
извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.
