По скратена постапка, без присуство на опозицијата, пратениците од владеачкото мнозинство во Собранието, денеска го изгласаа Законот за основање на нов универзитет „Дамјан Груев“. Предлог-законот доби поддршка од 67 пратеници, а шест од присутните беа против.
Станува збор за Универзитет за одбрана, безбедност и мир, проширен со уште три нови факултети: економски, градежен и архитектонски. Заменик министерот за образование и наука Спиро Ристовски потенцираше дека основната идеја за основање на Универзитетот е да се зголеми квалитетот на високото образование, пред се, во неколку области од исклучително значење за квалитетот на целокупниот развој на Република Македонија.
“Мораме да признаеме дека е јавна тајна дека сите фамилии и студенти имале проблем. Тоа не треба да даде генерална слика на сите професори, ама дека има монопол – има. Дали само фамилијарните лози просперираат – така е. Цели ходници се со исто презиме на Медицинскиот факултет, вие не можете да станете ниту асистент, ако вашиот татко не бил професор на Медицина или на Правен. Не можете да најдете градежен инженер за да го вработите, има апсолутен недостаток”, изјави пратеникот од ВМРО – ДПМНЕ, Илија Димовски.
За пратеникот од ДПА Орхан Ибраим, со основањето на Универзитетот, меѓу другото, наместо внатрешна интеграција и соживот се прави сегрегација.
“Шверцерското враќање на Законот за основање на универзитетот „Дамјан Груев“ во Собранието е уште една тула во ѕидот што власта сака да го изгради околу Универзитетот ‘Кирил и Матодиј’. Власта повторно го брани единствено партискиот интерес, со ставање на законот на седница кога опозицијата е надвор од Собранието. Нема дебата, нема аргументи, има само партиска наредба и партиски интерес! СДСМ ги искажа сите свои аргументи за овој предлог закон со поднесување близу илјада амандмани. Академската јавност ги искажа своите сериозни критики. На Република Македонија не и потребен уште еден партиски универзитет, на штета на финансирањето на другите државни универзитети”, изјави Петар Атанасов од опозиционата СДСМ, која веќе втор ден ја бојкотира работата на Собранието.
Откако Одборот за акредитација и евалуација на високото образование издаде дозвола за формирање на нов државен универзитет, ЦИВИЛ Медиа разговараше со професорката д-р Гордана Силјановска – Давкова, и д-р Ненад Марковиќ, од Правниот факултет на УКИМ, и со професорот во пензија на Медицинскиот факултет, д-р Владимир Борозанов, за нивниот став по ова прашање.
ЦМ
