Координаторот на ВМРО-ДПМНЕ во Собранието на Република Северна Македонија, Никола Мицевски, во името на партијата и пратеничката група, денеска излезе со предизвик. Предложија пратениците да имаат само македонско државјанство.
СДСМ излезе со експресен одговор. „СДСМ поддржува пратеници да бидат лица кои имаат единствено македонско државјанство, но тоа да важи и за пратениците од актуелниот пратенички состав“ – соопштија тие.
Својата реакција, СДСМ ја дополнија и со предлогот пратеници да не може да бидат лица кои се осудувани за кражби во други држави, како на пример лицето Антонио Милошоски, односно лица кои со своите незаконски дела го нарушуват имиџот на земјата.
ИЗЈАВА НА ДЕНОТ: Пописот може да се изврши и пред вратите на домовите, па дури и пред влезовите во зградите
Деновиве, во ЦИВИЛ се јавија голем број граѓанки и граѓани со прашања дали ќе може да учествуваат во пописот на тој начин што ќе ги дадат одговорите на попишувачот пред вратата на станот или во дворот на својата куќа. ЦИВИЛ се обрати до Државниот Завод за Статистика (ДЗС) со прашањето дали може да се изврши пописот на тој начин, бидејќи немаат никаква намера да го бојкотираат процесот. Прашањето беше: Дали граѓанките и граѓаните кои не се чувствуваат доволно безбедно, може да одговорат на прашањата на попишувачите пред вратите на своите домови?
„Сите граѓанки и граѓани кои не се чувствуваат комфорно да им дозволат на попишувачите да влезат во нивните домови, истото можат, како што препорача и Комисијата за заразни болести, попишувањето да го извршат пред вратите на своите куќи или станови, а доколку временските услови дозволуваат во моментот, истото може да се спроведе во надворешни услови, односно во дворовите на куќите или пред влезовите на зградите“, одговорија од ДЗС за ЦИВИЛ.
ЦИВИЛНИ АКТИВНОСТИ
ЦИВИЛ ќе одржи бесплатни вебинари за граѓанско новинарство и медиумска писменост на 19 и 20 март (петок и сабота) со почеток во 13 часот. Вебинарите ќе траат најдоцна до 17:30 часот.
Можност за учество имаат сите заинтересирани што сакаат да стекнат нови информации и вештини од областа на новинарството и мониторингот.
Заинтересираните треба да пополнат Апликација за учество која одзема максимум 1 минута.
ФЛЕШ ВЕСТИ
Правда- Во Основниот кривичен суд во Скопје продолжи судењето за случајот „Тортура“, при апсењето на лидерот на ОМ, Љубе Бошковски.
Во Основниот кривичен суд во Скопје денеска продолжи судењето за организаторите на случувањата во Собранието на 27 април 2017 година, но по изведените материјални докази предложени од одбраната на Миле Јанакиески, судењето продолжува на 16 март.
Судијката Беса Адеми денеска пред Судскиот совет даде свечена заклетва како претседателка на Врховниот суд на Република Северна Македонија.
Попис- ДЗС соопштија дека сите мерки предвидени со Протоколот донесен од страна на Комисијата за заразни болести и Владата на РСМ се почитуваат и со нив се гарантира безбедноста на сите учесници во Пописот, а до денеска преку апликацијата за самопопишување досега се евидентирани 49 837 лица.
Политика- Лидерот на ДУИ Али Ахмети тврди дека нема раздор во партијата и дека парламентарното мнозинство е стабилно и покрај тоа што пред два дена досегашниот координатор на пратеничката група Изет Меџити се повлече од таа должност, а на негово место дојде Арбер Адеми.
Претседателот Стево Пендаровски денеска свика седница на Советот за безбедност на Република Северна Македонија каде единствена точка на дневен ред е Информација за стратешките набавки во Армијата во наредниот период.
Општество- По кусо боледување вчера почина Горан Гаврилов (54), основач и сопственик на Радио Канал 77 и порталот Македонски медиа сервис. Гаврилов беше основач и прв човек на Асоцијацијата на приватни електронски медиуми во Македонија (АПЕММ).
Претседателот на држава Стево Пендаровски смета дека има целосна логика во воведување на полицискиот час од 22 до 5 часот, бидејќи како што рече, тоа е на предлог на експертите. Тој испрати апел до сите граѓани да ги почитуваат мерките.
КОВИД-19- Здравствените власти очекуваат сегашните рестрикции да дадат резултат иако продолжува трендот на зголемување на бројот на заразени со Ковид-19. Состојбата внимателно се следи и од епидемиолошката состојба ќе зависи дали ќе има нови мерки.
Во земјава продолжува вакцинацијата на здравствените работници со 3 000 вакцини набавени од Русија, како и ревакцинацијата со Фајзер што беа добиени преку Србија. До крајот на месецов се очекува да пристигнат и околу 40 000 дози од Фајзер и АстраЗенека, со што ќе стартува и масовната имуниазацијата на населението.
Зелени- Над 13.000 тони опасен линдан лежат во малата депонија во ОХИС и четирипати повеќе (над 50.000 тони) во големата, а не се знае уште колку илјадници тони канцерогена хемикалија има во другите две депонии, едната во дворот на некогашната фабрика, а другата надвор од неа, кај локалитетот Пеленица близу Драчево.
СЛОБОДНА ЗОНА
„Не треба сега тие да се лутат и да протестираат кога се жртви на оваа долна провокација на Каракачанов наменета за нивна политичка компромитација. Оти, целата пропагандна опозициска машинерија ревносно и алармантно ги пренесуваше, засилени со партиски соопштенија и апокалиптични прес-конференции, сите националистички навреди и клевети на Каракачанов кога им одговараше да покажат дека политиката за добрососедство на Заев не дава резултати и дека е „предавничка“ – да, тогаш го ценеа и фактот на официјалната позиција на Каракачанов како потпретседател на Бугарската влада. Ама, тој и сега е истиот и на истата позиција (да се надеваме, не за долго), само што целта не му е Заев и неговата политика, туку пропагандниот „демолишн бенд“ од врвот на „побратимите“ од македонското ВМРО“ пишува Сашо Орданоски во колумната „Апостолите на политичката лага“.
И.К.
