Еврокомесарот за проширување Јоханес Хан, заедно со тројцата европратеници Иво Вајгл, Едвард Кукан и Кнут Флекенштајн, утре треба да пристигнат во Македонија. Очекувањата од нивната посета се големи, а секоја од страните кои се дел од политичката криза во земјата, има различни пораки и барања од еврокомесарот.
Од ВМРО-ДПМНЕ, соопштуваат дека до Хан ќе испорачаат три барања.
„Прво, очекуваме јасно да ја осуди Тиранската платформа и јасно да осуди мешање на странски држави во внатрешните работи на Република Македонија. Втора работа што ВМРО-ДПМНЕ ја очекува од комесарот и од Европската унија е да се почитува правилото при формирање на Влада кое значи, победникот во македонскиот, секогаш да коалицира со победникот во албанскиот блок. И трето, да се испочитуваат преку 200.000 луѓе кои секој ден се низ сите градови во Македонија и имаат свој став“, велат од ВМРО-ДПМНЕ.
Од СДСМ сметаат дека нема што му пренесат на еврокомесарот, а што претходно не е соопштено и што тој и ЕУ не го знаат.
„Имаме јасно изразена волја од мнозинството граѓани и мнозинството во Собранието треба да ја формира новата влада. Не треба ние ништо да им кажеме, самата ЕУ во последниот извештај ја категоризираше Македонија како заробена држава. Македонија се ослободи на минатите избори, а сега е во заложништво, само на еден единствен човек, а тоа е Никола Груевски. Многу бргу ќе дојде денот кога ќе се состане Собрането, ќе се избере претседател на Собранието и Македонија ќе добие нова демократска влада“, е ставот на партијата што вчера го пренесе потпретседателот, Дамјан Манчевски.
И од граѓанската иницијатива „За заедничка Македонија“, со порака до Хан. Оттаму, за утре најавуваат масовен протест.
„Јасно, гласно и недвосмислено сите заедно, граѓаните на Македонија пред комесарот на Европската унија, Јоханес Хан, да кажеме не – за влада која ќе работи според тиранската платформа, не – за рушење на унитарноста на државата. Сите заедно да ги претставиме нашите црвено- жолти линии, кога ако не сега“, се вели во повикот на иницијативата.
Што се однесува до ставот на Хан во однос на политичката криза, тој ја осуди одлуката на претседателот Ѓорге Иванов да не го додели мандатот, а мешањето на албанскиот премиер Еди Рама во политиката на албанските партии во земјава, го оцени како контрапродуктивно и ја обвини Русија дека „додава масло на огнот“.
Според неофицијални податоци, дел од агендата на Хан во Скопје, се средбите со парламентарните политичките партии, со претседавачот на конститутивната собраниска седница Трајко Вељаноски и со претседателот Ѓорге Иванов. Хан нема да се се сретне со претставници на граѓанскиот сектор.
