Израелската невладина организација Лекари за човекови права-Израел денеска соопшти дека „две предвремено родени бебиња починале“ бидејќи недостигот на гориво го спречил продолжувањето на неонаталната нега во Ал Шифа, најголемата болница во опколениот Појас Газа, а израелската војска вели дека болницата не е нивна мета и дека не е опколена, објави Ал Арабија.
„Голема опасност сега им се заканува на животите на 37 предвремено родени бебиња“, предупреди израелската невладина организација додека се интензивираат борбите меѓу израелската армија и припадниците на палестинското движење Хамас во близина на Ал Шифа во градот Газа.
Претходно денеска, портпаролот на Министерството за здравство во Газа изјави дека операциите во болничкиот комплекс Ал Шифа биле прекинати и дека како последица на тоа починало едно предвремено родено бебе.
Лекарите без граници (MSF), чии членови оперираат во болницата, наведуваат дека „во изминатите 24 часа болницата Ал Шифа била неколкупати нападната, вклучително и породилното одделение“.
Д-р Марва Абу Саада, шеф на одделот за хирургија во Ал-Шифа, изјави за невладиното здружение МАП (Медицинска помош за Палестинците) дека „никој не смее да ја напушти болницата Ал Шифа“.
„Луѓето кои се обидоа да излезат беа мета. Некои беа убиени, некои ранети“, рече тој.
Израелската армија тврди дека „немало напад врз болницата и дека таа не е опколена“.
„Има борби меѓу израелската армија и Хамас околу болницата. Дури и сега, ако некој сака да излезе, може… армијата може да обезбеди координација за секој што сака безбедно да ја напушти болницата“, изјави израелскиот офицер Моше Тетро.
Лекари без граници „најостро ја осудува смртната пресуда одредена од израелската армија за цивилите блокирани во болницата Ал Шифа“ и повикува на „безусловен прекин на огнот“.
Норвешкиот совет за бегалци (НРЦ), друга невладина организација, е „згрозен од извештаите за тековните напади врз болниците во Газа“.
Пациентите, меѓу кои има бебињата, и цивилите кои се засолниле таму, се фатени во стапица“, наведува НРЦ.
Израелската војска соопшти дека милитантите на Хамас, кои го нападнаа јужниот дел на Израел минатиот месец, поставиле командни центри под болницата Ал Шифа и други болници во Газа и ги направиле воени цели.
Хамас негира дека користи цивили како жив штит, а здравствените власти предупредуваат дека зголемените израелски напади врз или во близина на болниците ги ставаат во опасност пациентите, медицинскиот персонал и илјадниците евакуирани кои се засолнети во и околу комплексот.
Г. Т.
