Едно лице загина, а уште пет се повредени како резултат на руски ракетен напад врз Запорожје, објави на Телеграм Олександр Старук, шеф на регионалната воена управа на Запорожје, пренесува Укринформ.
„Утрото непријателот лансираше проектили врз регионалниот центар. Уште еднаш окупаторот ги гаѓаше инфраструктурните објекти. Оштетени се станбени згради наоколу. Според првичните информации, едно лице загина“, напиша тој.
Повредени се уште најмалку пет лица, додаде тој. Сите служби работат на лице место.
Како што објави Укринформ, утрото на 22 септември, непријателот лансираше девет проектили врз Запорижја. Според заменик-шефот на Кабинетот на претседателот Кирило Тимошенко, погодени се хотел во централниот парк на градот, електрична трафостаница и телевизиска кула.
Областите Никопол и Криви Рих во регионот Дњепропетровск повторно беа под непријателски напади. Едно лице загина, цивилната инфраструктура е оштетена, објави на Телеграм Валентин Резниченко, шеф на регионалната воена управа на Дњепропетровск.
„Околу полноќ Русите со Град МЛРС го гранатираа Никопол. Испукаа 20 гранати во централните населби. Убија 35-годишен маж“, напиша тој.
Во градот оштетени се станбена зграда од 17 ката и приватни куќи, гасоводи и далноводи. Улиците се покриени со урнатини и фрагменти од муниција.
Според регионалната администрација, руски проектили погодиле и две болници, училиште, фудбалско игралиште, локален историски музеј, административни згради, неколку продавници и пазар. Гранатирањето ги оштети и спомен-стелите на Алејата на меморијата.
Како резултат на нападот избувнале четири пожари во комерцијални тезги и гаражи. Пожарникарите веќе го изгаснале пожарот.
Пет цивили загинаа, а уште 12 беа повредени во руското гранатирање на регионот Доњецк на 21 септември, напиша Павло Кириленко, шеф на регионалната воена управа на Доњецк на Телеграм.
„На 21 септември, Русите убија пет цивили во регионот на Доњецк: двајца во Курахове, еден во Бахмут, еден во Авдиивка и еден во Карливка. Уште 12 лица беа повредени“, напиша тој.
Севкупно, 873 цивили се убиени, а 2.205 повредени во регионот на Доњецк од почетокот на целосната инвазија.
Регионалниот гувернер истакна дека во моментов е невозможно да се утврди точниот број на жртви во Мариупол и Волноваха.
Подготви: Д.Мишев
