Вкупно 447 деца се убиени, а над 856 повредени во Украина од почетокот на руската инвазија, објави Украинското државно обвинителство на Телеграм, јавува дописникот на Укринформ.
„До 15 декември 2022 година, над 1.303 деца во Украина беа погодени од руската вооружена агресија. Според податоците на обвинителите за малолетници, загинале вкупно 447 деца, а над 856 се здобиле со повреди со различна тежина“, се наведува во извештајот.
Овие податоци не се конечни, бидејќи се истражуваат во областите на воените дејствија, привремено окупирани и неодамна ослободени области.
Во моментов, најмногу жртви се регистрирани во регионот Донецк (426), регионот Харкив (267), регионот Кијив (117), регионот Миколаев (80), регионот Запорижја (78), регионот Херсон (72), регионот Чернихив (68), Регионот Луганск (65) и регионот Днипропетровск (33).
На 14 декември 2022 година, 8-годишно момче беше убиено во руското гранатирање на Херсон.
При документирање на воените злосторства извршени од страна на руските војници во регионот на Миколаев, беше откриено дека три сестри биле убиени во селото Новопетривка во областа Баштанка: две од нив биле на 16 години, а една на 14 години.
На 24 ноември 2022 година, 17-годишен тинејџер беше повреден во руското гранатирање на Херсон.
Како резултат на секојдневните воздушни и артилериски напади на Русија, ширум Украина беа оштетени вкупно 3.126 образовни институции, а 337 од нив беа целосно уништени.
Подготви: Д. Мишев
