Врховната Рада објави дека ја усвои Резолуцијата бр. 13041 за поддршка на демократијата во Украина наспроти руската агресија.
„Со овој документ, Собранието ја потврдува својата легитимност и единство со претседателот на Украина Володимир Зеленски, кој беше избран на слободни и транспарентни избори“, се вели во соопштението од украинскиот законодавен дом.
Понатаму, Врховната Рада соопшти дека е невозможно да се одржат избори под воена состојба, бидејќи секојдневното гранатирање, окупацијата на дел од територијата и постојаната закана по животот на граѓаните го оневозможуваат почитувањето на демократските стандарди.
Во усвоената изјава се нагласува дека ваквите избори би се претвориле во фарса, слична на повторното именување на Владимир Путин во Русија. Парламентот истакна дека Русија и нејзиното раководство се одговорни за неможноста за избори во Украина.
Џ. Д.
