По втората пауза од лидерската средба, премиерот и претседателот на СДСМ, Зоран Заев, изјави дека тие на денешната средба го прифатиле барањето на ВМРО-ДПМНЕ, да се направат законски измени кои ќе овозможат техничка влада.
„За овие три лидерски средби требаше мудрост и трпение, јавноста треба да знае. Пруживме рака и покажавме разбирање за многу прашања. Уште пред потпишувањето на договорот со Грција, прифативме услови за избор на Државната Изборна Комисија. Уште пред лидерските средби работните групи на СДСМ и ВМРО-ДПМНЕ, го согласија текстот на новиот предлог-закон за финансирање на политичките партии, со вклучени предлози на опозицијата“, изјави Заев.
Тој додаде дека одлучиле денеска да заврши лидерската средба и да нема одложување, и дека договорот зависи од присутните на средбата.
„Завршивме една фаза, ја споделуваме со граѓаните, се враќаме на прашањето за референдумот. Ќе разговараме за карактерот на референдумот и за датумот за одржувањето на истиот. Ова го правиме како владеачко мнозинство, да покажеме доблести, заради важноста на овој процес“, додаде Заев.
На крајот премиерот додаде дека Македонија ќе биде членка на НАТО и Европската Унија.
А. Петровска
