Украинскиот претседател Володимир Зеленски најави дека викендов ќе се сретне со американскиот претседател Доналд Трамп во Флорида, во рамки на продолжените разговори за ставање крај на целосната руска инвазија врз Украина, пренесува Би-Би-Си.
Зеленски изјави дека очекува средбата да се одржи во недела и дека фокусот ќе биде ставен на мировниот план од 20 точки поддржан од САД, како и на посебни предлози за американски безбедносни гаранции за Украина.
„Нашата задача е да се погрижиме сè да биде 100 проценти подготвено“, изјави Зеленски, додавајќи дека планот во моментов е „90 проценти завршен“.
На социјалните мрежи тој напиша дека не се губи ниту еден ден во дипломатските напори.
„Договоривме средба на највисоко ниво – со претседателот Трамп во блиска иднина. Многу работи може да се решат пред Новата година“, порача Зеленски.
Во меѓувреме, од Кремљ соопштија дека продолжуваат контактите меѓу Москва и Вашингтон. Портпаролот на Кремљ, Дмитриј Песков, потврди дека висок советник на рускиот претседател Владимир Путин одржал телефонски разговори со американски претставници и дека Русија останува посветена на преговорите.
Москва зборува за „бавен, но стабилен напредок“ во разговорите, но досега не се изјасни за предлогот на Зеленски – Украина и Русија истовремено да ги повлечат своите сили од делови на источниот регион Донбас.
Украина, пак, инсистира на цврсти безбедносни гаранции од САД како дел од секој можен договор. Зеленски сугерираше дека демилитаризирана „слободна економска зона“ би можела да биде решение за делови од Донбас кои Русија не успеала да ги заземе со воена сила.
Белата куќа предложи воспоставување демилитаризирана зона во источна Украина, каде двете страни би се обврзале да не распоредуваат трупи, што би овозможило компромис без директно решавање на прашањето за правниот суверенитет врз спорните територии.
Зеленски најави дека Украина би можела да се повлече до 40 километри од сегашната линија на фронтот за создавање економска зона, но само доколку Русија го стори истото од окупираните делови на индустриското срце на Донбас.
Иако Кијив успеал да издејствува измени на претходниот нацрт-план од 28 точки, кој според дел од аналитичарите бил поповолен за Москва, Зеленски призна дека прашањето за територијата останува најтешко за решавање, заедно со иднината на нуклеарната централа Запорижја – најголемата во Европа, која моментално е под руска контрола.
Во меѓувреме, борбите на терен продолжуваат. Градоначалникот на Харкив соопшти дека две лица загинале, а повеќе биле повредени во руски воздушен напад. Украинските воздухопловни сили објавија дека во текот на ноќта биле соборени 73 руски дронови.
Ј. Ѓ.
