„Европската унија со нетрпение очекува формирање на нова влада во Република Македонија, а политичките партии да донесат одлука каква влада или коалиција ќе се формира“, изјави евроамбасадорот Самуел Жбогар, за време на посетата на Прилеп, во рамки на кампањата „ЕУ за тебе“.
„Ние, како ЕУ, немаме став по тоа прашање, но наш интерес е да се формира силна коалиција во поширок контекст, сите да дадат поддршка за реализација на европската агенда“, изјави Жбогар во Прилеп. Тој истакна дека очекува од политичките партии да ја поддржат европската агенда, без разлика дали се во опозиција или на власт.
„Најважно е дека гледаме оти сите политички партии ја подржуваат агендата на ЕУ. Веруваме дека токму европската агенда е центарот, ткивото што би ги обединило сите политички партии во вашата земја и се надеваме дека ќе има широка поддршка, не само од партиите кои се на власт, туку и од опозицијата“, додаде Жбогар.
Тој, исто така ја најави посетата на еврокомесарот Јоханес Хан кој, освен на министерската средба за енергетика за Западен Балкан, ќе има билатерални средби со политичките лидери, за како што рече Жбогар: „Комесарот Хан од прва рака ќе види каде стоиме и како ЕУ може понатаму да ја поддржи земјата“.
Евроамбасадорот Жбогар пред неколку дена изјави дека не е тешко да се обезбедат над 61 потпис и да се формира нова влада. „Ние мислиме дека нема да биде тешко да се обезбедат 61 потпис, а можеби и повеќе. Тоа што е важно е новата Влада да биде посветена кон реформите, а тоа е важно за целата држава. Потребна е коалиција за реформи и токму поради тоа, мислам дека нема да биде тешко да се соберат потписи за коалиција за да се спроведат реформите на ЕУ“, изјави евроамбасадорот во Македонија, Самуел Жбогар.
