Жителите на Општина Дебарца протестираат во знак на револт против предлогот на Министерството за животна средина за изградба на регионална депонија во атарот на селото Годивје, со дециден став дека „не сакаат фабрика за отпад во најчистата околина“ и најавија радикализација на протестите и блокади на патиштата, ,ако не се најде друга локација за депонијата“
„Дебарца е историски најнапатената област во Македонија. Долго време на маргините на интересот на сите досегашни влади. Селата се напуштени и запуштени, луѓето се иселени… Но, тоа не значи дека духот на нашите предци, духот на сите прогресивни умови од овој крај е исчезнат. Тој живее во сите нас и во сите раселени по градовите, барајќи егзистенција по напуштените фабрики и газдинските фирми… Јас се отселив од Скопје во селото Годивје, поради потребата од создавање здрави услови за мојот животен стил, поради потребата да се доближам до чистата природа, поради потребата да направам нешто за мене и за мојата животна средина… Јас живеам овде, во чистата природа, а сега таа има најголема потреба од сите нас! Дебарца ќе остане чиста и незагадена и секогаш ќе пружа одмор, мир, чистота и револуционерност, не само на нас, туку и на сите прогресивни луѓе од Македонија, напиша гинекологот, д-р Јадранка Бибан, основач на „Здружението за здравствена едукација и екологија 8-ка“, во нејзината јавна кандидатура „за непартиски, независен и обединувачки градоначалник на нашата револуционерна општина Дебарца“.
Иако причини сигурно има повеќе, непосреден повод за реакцијата на д-р Бибан и за нејзината кандидатура е и фактот дека во рамки на проектот за изградба на интегриран систем за управување со цврст отпад во Југозападниот плански регион што ќе се реализира со средства од ИПА- фондовите, од 12 предложени локации, предвидено е регионалната депонија за неколку градови од Западна Македонија, да се изгради во општината Дебарца, во реонот на селото Годивје, а со нејзиното пуштање во употреба до 2020 година, да се затворат бројните диви депонии, меѓу кои и струшката.
Но, веднаш се огласија граѓан(к)ите, кои како докторката Бибан, незадоволни, реагираат поради можноста за загадување на недопрената природа.
И градоначалникот на Дебарца, Игор Трајковски од ВМРО-ДПМНЕ, се закани со блокади и протести доколку почне да се гради регионална депонија на просторот на оваа општина: „Согласно моите ингеренции ќе направам сè што е во моја надлежност, да не се изгради оваа депонија, а исто така, поради очигледниот револт, кој беше искажан на Јавната расправа за студијата за оцена на влијанието врз животната средина за изградба на регионална депонија одржана на 18 јули 2017 година, населението е подготвено да преземе порадикални мерки согласно законите во Република Македонија, како што се блокирање на патишта и протести”, рече Трајковски.
И советничката група на СДСМ од Општината е против регионалната депонија. „Во врска со одржаната Јавна расправа по Студијата за влијанието на Интегрираниот систем за управување со отпад во Југозападниот плански регион врз животната средина, на која како најсоодветна локација за изградба на регионалната депонија беше посочена локацијата во атарот на село Годивје, Дебарца, како советничка група на СДСМ во Советот на општината Дебарца го поздравуваме секој проект кој е во правец на решавање на проблемите со управувањето со отпадот на регионално ниво, но сметаме дека посочувањето на Дебарца, како локација за изградба на регионалната депонија во најмала рака е несреќна замисла , несоодветна и неприфатлива од повеќе причини“.
Градоначалникот Трајкоски побара поддршка од советниците – за итно распишување на референдум на кој граѓаните ќе се изјаснат дали сакаат или не депонија во својата општина, по што, советниците се согласија и на итна седница ќе одлучат дали референдумот и ќе се организира.
Од Општината потенцираа дека никој од Дебарца не дал позитивно мислење за депонијата и дека се работи за најголемото сливно подрачје на Охридското езеро кое што е под заштита на УНЕСКО: „Општина Дебарца претставува еколошки чиста средина, без тешка индустрија, и од овие причини недозволива е изградба на регионална депонија, односно, изградба на најголема фабрика за загадување на општината”.
Годивјани пак, во медиумите реагираа дека се работи за пасишта каде има и „најубави печурки“, дека населението живее од сточарство и земјоделие и дека ќе биде присилено да се иселува, а изразија и недоверба дека депонијата ќе биде изградена според највисоките еколошки стандарди, како и стравување, дека и покрај почитувањето на стандардите, сепак, може да се случат штетни последици по животинскиот и растителниот свет во сливното подрачје и во самото Охридско Езеро. Жителите потенцираа дека Дебарца со 5.000 жители е најмала општина според бројот на жители во Југозападниот плански регион и најмал создавач на отпад. Тие сметаат дека е нелогично и економски неиздржано, отпадот од целиот регион да се носи и депонира во подрачје каде што отпад најмалку се создава.
Во меѓувреме, реагираа и еколози, но став на ресорното Министерство е дека Годивје е најсоодветна локација, дека депонијата би била трајно решение за дивите депонии во околината и дека со линија за селекција на отпад и со производството на биогас, само мал дел од отпадот ќе биде депониран.
