Колку Државната изборна комисија е должна да ја информира јавноста за тоа колку чини привилегираната услуга за остварување на уставно гарантираното гласачкото право.
Посебно ако имаме предвид дека низ годините и не ѝ беше многу тешко, ниту пак, нешто се „уби“ од работа да ја заштити јавноста и нејзиното уставно загарантирано право, со акцент на уставноста.
И кога ЦИВИЛ, како организација со долгогодишно изборно мониторирање ќе праша за буџетот, јавните набавки, патните трошоци, бонусите, наградите… тогаш навлегува во подрачје оградено со бодликава жица.
Затоа што, таксативно побараните информации од јавен карактер:
Документација (повик, одлуки, договори), како и информации за видот и вредноста на јавните набавки, поврзани со набавка на комуникациска опрема (телефони, мобилни телефони и друго) од буџетот на ДИК, список со имиња и информација за висината на поединечните месечни примања на членовите на Државната изборна комисија, (9-те члена, вклучително и Претседателот и неговиот заменик), список со имиња и и информација за висината на поединечно исплатените награди, односно хонорари или бонуси на членовите на Државната изборна комисија (9-те члена, вклучително и Претседателот и неговиот заменик), информација за висината на поединечно исплатените надоместоци за трошоци за патување (по член на Државна изборна комисија и вкупно), информација за исплатените износи за репрезентација (по член на Државна изборна комисија и вкупно), информација за исплатените износи за прекувремено работење (по член на Државна изборна комисија и вкупно), и нормално пристап до годишниот буџет на Државната изборна комисија. Сите информации се побарани за 2016 и 2017 година.
И не се од јавен интерес.
Односно не се од јавен каракртер и за истите ДИК не е должна да приложи информации.
Е сега, ако Избирачкиот список ви е во невиден хаос, ако Општиниските изборни комисии, во зависност од изборните процеси, се недоволно едуцирани или недоволно информирани што треба да преземат во критични моменти, ако избирачките одбори се составени од партиски и партиски (нема непартиски) членови, ако Изборниот законик крахира на клучни прашања, а гласачите имаат глас, ама немаат право да го искористат, нели ви се чини дека, не само што се преплатени, туку и буквално се навлезени во навиката да се живее на „висока нога“.
И сега алармот и мртов на нозе ќе дигне, ама медумите глуви. Барем со едно уво да слушнеа, можеби нешто ќе покренеа во јавноста, која ништо не слушна, ништо не гледа, па нормално и дека нема што да каже.
И ова се однесува на случајот ДИК, да бидеме до крај коректни и јасни.
„Како да било повеќе од извесно дека ДИК ќе ја заврши работата беспрекорно, па однапред заслужува мобилни, бонуси и разни други исплати, како дополнување на платите кои, ете, не биле податоци од јавен карактер.
Секако, Државниот завод за ревизија би требало да биде во состојба да побара одговор на овие прашања. Можеби ДЗР ќе биде доблесно и ќе се придржува до законите и ќе ги сподели тие информации со нас. “(Колку мобилни и по која цена се набавени во ДИК?, колумна на Џабир Дерала, Плусинфо, 09/11/2017).
Ниту ЦИВИЛ, ниту Дерала, ниту јавноста, доби поинаков одговор од веќе добиениот. Ниту пак, „шокантното расипништво“, како што го нарекува Дерала во денешната колумна(Шокантното расипништво на ДИК-овците, Плусинфо, 5/12/2017,) магично ќе исчезне со оваа најавената јавно-тајна седница на ДИК во 14 часот.
Биљана Јордановска