На денешната одбрана од интерпелацијата која за него во Собранието, ја поднесе ВМРО-ДПМНЕ, министерот за надворешни работи Никола Димитров, изјави дека по толку години стагнација и назадување, сега, кога конечно вратите се отворени и се случува нешто позитивно за Македонија, разбирлива е возбудата на ВМРО-ДПМНЕ. „Промовирате грдо лице за Македонија во светот и ми ја правите работата потешка!“, ѝ порача Димитров на ВМРО-ДПМНЕ.
За договорот за добрососедство со Бугарија, Димитров рече дека 98 отсто бил наследен од претходната власт и ја обвини ВМРО-ДПМНЕ за лицемерие.
„Хипокирзија е ако започнеш и учествуваш во преговарачки процес кој трае со години, си го водел нетранспарентно а обвинуваш дека не е транспарентно потпишувањето. 98 отсто од договорот со Бугарија го наследив, бил преговоран со години! Тие два отсто кои успеавме да ги смениме се апсолутно подобрување на текстот и во делот на зедничката историја. Во однос на грижата за нашето малцинство, мешање во внатрешните работи на друга држава не е политика на Република Македонија и тоа го има во вториот амандман во Уставот и во Времената спогодба. Обврските на соседска Бугарија се наоѓаат во меѓународната конвенција што го таргетира ова прашање и е член 14 што не постоеше во претходниот текст“, рече Димитров.
Хипокризија е, рече тој, да се повикуваш на добрососедство, а да не работиш на негово подобрување. Да се самодекларираш, како заштитник на националните интереси, а да не понудиш одржлива иднина на сите граѓани.
Во однос на спорот за името со Грција, Димитров рече дека решението ќе биде прашање на широк, нацинален и политички консензус.
„Како што знаете, договорот со Бугарија е прв нацрт-текст дебатиран пред да биде потпишан. Јасно е дека надминувањето на разликата околу името може да биде постигнато низ транспарентен процес. Јас како министер, немам намера да отворам прашања од минато чија цел е конфронтација и заглавеност. Не ни треба натпревар чии споменици се поголеми за да бидеме горда нација! Првокациите се аргументи против нашите национални интереси“, одговори Димитров. „Спорот со името“, вели Димитров, „е долгогодишно и комплицирано прашање кое бара сеопфатен приод, но не може да го игнорираме, додаде, слонот во собата“.
Според министерот, и прашањето за бегалците се злоупотребува, за ширење на дезинформации, дефокусирање и предизвикување страв кај граѓаните. Никој нема побарано, рече, Македонија да стане дестинација за прием на бегалци.
„На опозицијата очајно ѝ треба нов наратив. Не сакате да зборуваме за пустошот, но само лошо правите со стравот од бегалци кои практично ги нема. Во прифатниот центар во Скопје има 23 од кои 18 се деца, избегани од војна. Промовирате грдо лице за Македонија во светот и ми ја правите работата потешка!“, порача тој.
За неговиот ресор во „стоте дена на Владата“, тој рече дека остварил средби со 37 министри за надворешни работи, дал над 30 интервјуа, и се сретнал со над стотина меѓународни претставници.