Судот му изрече два месеца затворска казна на градоначалникот на Кавадарци, Александар Панов за нудење и давање поткуп за време на минатогодишните предвремени, парламентарни избори, објави новинската агенција МЕТА.
За кривичното дело за кое е осуден Панов, предвидена е парична казна или казна затвор од една година. Како што при изрекувањето на пресудата појаснил судијата Лазар Нанев, според класификацијата на делото и околноста дека Панов е досега неосудуван, законодавецот утврдил парична казна или казна затвор од еден до два месеца. Кавадаречкиот градоначалник ја добил максималната предвидена казна, која ќе се изврши по правосилноста на пресудата.
Според Обвинителството, Панов, кој е градоначалник од редовите на ВМРО-ДПМНЕ, на 9 декември, минатата година, два дена пред одржувањето на парламентарните избори, во својата канцеларија во Општината, на три лица со право на глас им дал по 1.000 денари за да гласаат за ВМРО-ДПМНЕ.
Панов и неговиот адвокат денеска не присуствуваа на изрекувањето на пресудата.
ЦИВИЛ – Центар за слобода ги набљудуваше предвремените парламентарни избори во 2016 година и излезе со низа наоди за изборни нерегуларности во својот Извештај од изборниот мониторинг. Мониторинг тимовите на ЦИВИЛ известуваа за голем број случаи на кршење на човековите права во изборен контекст, злоупотреби, притисоци, поткуп на гласачи и други облици на политичка корупција и изборни манипулации.
извор: МЕТА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.
