ВЕСТ НА ДЕНОТ
ДИК не го донесе упатството за бројот на советници во советите на општините и Градот Скопје
Државната изборна Комисија денеска не го донесе упатството за пополнување на образец на листи за кандидати за членови на совети на општини и на Градот Скопје, откако членот на ДИК Дитмире Шеху побара одлуката да се донесе со консензус, едносгласно, повикувајќи се на одредби од Изборниот законик кои, како што рече, предвидуваат член на Комисијата да може да побара вакво гласање ако одлуката се однесува на немнозинските заедници. За Шеху е спорно да се донесе вакво упатство врз основа на постојна одлука на Владата, со која, како што нагласи, бил намален бројот на советници врз основа на пописот кој населението го дели на резидентно и нерезидентно. Според неа, бројот на советници во општините и во Градот Скопје се утврдува согласно Законот за локална самоуправа, а не согласно одлука на Влада.
Со оглед на барањето на Шеху, за ова прашање ќе треба да се произнесе правната служба на Државната изборна комисија во одреден временски рок. Претседателот на ДИК Борис Кондарко претходно истакна дека вакво упатство за локалните избори во 2021 година било донесено врз основа на одлука на Влада од 2004 за број на советници во општините и во Градот Скопје.
ИЗЈАВА НА ДЕНОТ
„Човечката цена на оваа војна мора да заврши. А тоа значи секое украинско дете киднапирано од Русија да биде вратено кај своето семејство. На денешниот Европски совет разговараме за напредокот постигнат во нашите напори за мир во Украина. Во Вашингтон, разговорите напреднаа за силни безбедносни гаранции за Украина, запирање на крвопролевањето, санкции и враќање на киднапираните деца. Нашата работа и тесна соработка продолжуваат“, изјави Урсула фон дер Лајен.
РЕГИОН
Жестоки протести во Србија: Потсетува на Кијив во 2013 и 2014 година
Антивладини протести се одржаа низ цела Србија, додека светските медиуми оценија дека Вучиќ усвоил „стратегија на страв“ со тоа што ги извадил хулиганите и приватното обезбедување на улиците, соочувајќи ги со демонстрантите. Во едно од неговите чести телевизиски обраќања до јавноста, Вучиќ ги обвини демонстрантите за „чист тероризам“ и ги повтори тврдењата дека повеќемесечните постојани протести против неговата влада биле оркестрирани од Западот и имале за цел уништување на Србија. Протестите во Србија продолжуваат од вечер до вечер, а студентите – по неколкуте масовни собири низ целата земја, кои заедно со други собраа стотици илјади луѓе во Белград на 15 март – навестија „повторување“ оваа есен, најверојатно во септември.
СВЕТ
Унгарија се нуди како потенцијално место за средбата Зеленски-Путин, во игра и Швајцарија и Турција
Разговорите меѓу претседателот Володимир Зеленски и рускиот претседател Владимир Путин би можеле да се одржат во Унгарија. Средбата би била прва од таков вид меѓу Зеленски и Путин од почетокот на целосната инвазија на Русија во февруари 2022 година. Двајцата лидери последен пат се сретнаа во Париз во декември 2019 година како дел од разговорите од Нормандискиот формат со посредство на Франција и Германија.
ПРАШАЊЕ НА ДЕНОТ: Што мислите за настаните во Србија?
АНАЛИЗИ
„ЕУ-интеграциите, правата на Албанците и линијата Тирана–Приштина остануваат „рамка“ во која албанските партии ќе ја водат својата кампања, но и арената во која ќе се тестира нивната способност да изградат доверба кај сопствениот електорат и да мобилизираат поширока поддршка. Во услови на засилена конкуренција и фрагментација на гласовите, прашањето не е само кој ќе освои повеќе општини, туку кој ќе успее да се наметне како легитимен претставник на албанската заедница во следниот политички циклус“; пишува Дијана Тахири во анализата „Албанскиот политички кампус во пресрет на локалните избори: Меѓу наративите и политичкиот прагматизам“.
СЛОБОДНА ЗОНА
„Не верувам дека јас сум тој што се бори со ветерници. Добро знам дека светот може да потоне во темнина – можеби тоа веќе се случило на многу места. Но, исто така, го знам и ова: тишината и соучесништвото се избор. Да се престане со кажување на вистината, да се преведува јазикот на измамата и насилството во она што другите учтиво го нарекуваат „реалистична анализа“, според мене, не е професионализам. Тоа е предавање. Тоа е морална корупција. Одбивам да ја играм таа игра. Подобро е да ме наречат наивен, емотивен или нереалистичен, отколку да станам полирана полица, слуга на лагите. Бидејќи на крајот, историјата не ги памети комфорните коментатори, туку оние што одбиле да се поклонат пред „реалностите“ на тиранинот“, пишува Џабир Дерала во „На студот, заедно со жртвите“.
Подготви: Б. Јордановска
