ТЕМА НА ДЕНОТ
Обраќање на Фон дер Лајен пред Европарламентот за „Состојбата на Унијата“
Претседателката на Европската комисијата, Урсула фон дер Лајен денеска во Европскиот парламент во Стразбур ќе го одржи своето годишно обраќање за „Состојбата на Унијата“.
ЕУ ќе отвори истрага за кинеските субвенции за електрични автомобили
Претседателката на Европската комисија Урсула фон дер Лајен денеска најави истрага за субвенционирање на електрични возила што доаѓаат од Кина. Глобалните пазари се преплавени со евтини кинески електрични автомобили, рече фон дер Лајен, обраќајќи им се на пратениците во Европскиот парламент во Стразбур во годишното обраќање за „Состојбата на Унијата“.
Фон дер Лајен: Ќе продолжам да бранам чесна транзиција кон зелена енергија и силна геополитичка унија
Иднината на нашиот континент зависи од изборите што ги правиме денес за чекорите што ги преземаме за да ја комплетираме нашата Унија. Народот на Европа сака Унија која ќе ги брани во време на конкуренција на големите сили, но и ги штити и стои блиску до нив, како партнер и сојузник во нивните секојдневни битки. И ние ќе го слушаме нивниот глас.
ИЗЈАВА НА ДЕНОТ
Фон дер Лајен: Да ја комплетираме Унијата со 30+ членки
– Сметам дека и следното проширување мора да биде катализатор за напредок. Почнавме да градиме Здравствена унија на 27 земји и верувам дека можеме да ја завршиме на 30+. Почнавме да ја градиме Европската одбранбена унија на 27 земји и верувам дека можеме да ја завршиме на 30+. Докажавме дека можеме да бидеме геополитичка унија и покажавме дека можеме брзо да се движиме кога сме обединети. И верувам дека Тимот Европа ќе работи и со 30+, рече Фон дер Лаја.
ВОЈНА ВО УКРАИНА
Украинската амбасадорка во земјава, Лариса Дир, преку Твитер објава се заблагодари на Северна Македонија што се приклучи кон Коалицијата на држави кои работат на алгоритмот за создавање на Специјалниот трибунал за злосторството на руската агресија против Украина.
*
Според украинското воено разузнавање, повиците од руските војници за предавање се зголемија за 70% откако дезертираше пилотот на хеликоптер.
*
Украина изврши ракетен напад врз руската поморска база на привремено окупираниот Крим, при што се погодени и оштетени два брода, меѓу кои, наводно и подморницата од класата Кило
*
Ново светло на понатамошниот развој на односите помеѓу Унгарија и Русија дополнително фрла објавата на премиерот на Унгарија, Виктор Орбан, за својата намера да се откаже од употребата на руско гориво во единствената нуклеарна централа во земјата.
ОМБУДСМАН Народниот правобранител има добиено над 30 претставки од страна на граѓаните за брзите кредити, вели Народниот правобранител, Насер Зибери, кој во Штип одговараше на прашањето, дали граѓаните доставуваат претставки имајќи во предвид дека МВР за половина година има евидентирано 65 пријави на измамени граѓани
ИЗМЕНИ НА КРИВИЧНИОТ ЗАКОНИК Премиерот Димитар Ковачачевски денеска повтори дека измените во Крвичниот законик, за кој имаше забелешки во јавноста дека се донесени експресно и без претходна јавна дебата, се усвоени со цел да се помогне во зголемувањето на ефективноста и ефикасноста на правосудниот систем.
ВЛАДЕЕЊЕ НА ПРАВОТО Северна Македонија се обврза да го промовира владеењето на правото и да се бори против неказнивоста и затоа, санкциите за корупциски активности мора да бидат ефективни, соодветни и разубедувачки, изјави портпаролката на Европската комисија задолжена за соседство, проширување и меѓународни партнерства Ана Писонеро запрашана за коментар за Измените во Кривичниот законик.
ЗЕЛЕНИ Оваа недела, за време на состанокот на Генералното собрание на Обединетите нации во Њујорк, ќе започнат преговорите на министерско ниво за планирање на Самитот на иднината во 2024 година. Со оглед дека колективна иднина зависи од трансформативната промена во нашиот однос со планетата, ваквото здружување со заеднички напори за спас на планетата мора да биде на врвот на агендата.
МАКЕДОНСКА КУЛТУРА ВО ЧИКАГО И градоначалникот на Чикаго Брендон Џонсон го прогласи септември за месец на македонско-американското наследство, откако неодамна и гувернерката на Мичиген Гречен Витмер повика македонската култура да се слави во оваа сојузна држава во текот на септември, јави Гласот на Америка.
АЛ-ПРЕС
Редакциски избор на ЦИВИЛ Медиа од албанските медиуми во регионот – Новиот Министер на Албанија, за Европа и надворешни работи, Игли Хасани, рече дека главен приоритет на министерството и понатаму ќе бидат евроинтеграциите, а Американскиот Стејт департмент испрати уште една порака до албанските власти во врска со случајот со градоначалникот на Химара, Фреди Белери, кој останува во притвор, пишуваат албанските медиуми.
АНАЛИЗА
И покрај отпорната економија која им пркоси на повеќето прогнози – досега избегнувајќи рецесија и одржување ниска невработеност– Американците се чинат сé понемирни. Голем дел, без доверба дека денешната добра состојба ќе трае, веруваат дека земјата оди во погрешна насока. Уште повеќе, Америка се соочува можеби со најсложената и најопасната геополитичка ситуација од падот на Берлинскиот ѕид, пишува Мајкл Џ. Боскин во анализата „Немирна Америка“.
АНАЛИТИЧАРИ
„Слична траекторија треба да се изоди и во билатералните прашања со Бугарија, дел од кои се услов во преговарачката рамка на ЕУ за членство на Северна Македонија. Уставните измени не го нарушуваат идентитетот ниту јазикот на Македонците, и треба да се прифатат за да можеме да чекориме побрзо во евроинтеграциите“, вели за „Фронтлајн“, Петрит Сарачини од Институт за медиуми и Аналитика (ИМА), зборувајќи за политичките случувања во земјава во однос на спорот со Бугарија и уставните измени во текстот на Дестан Јонузи „Спорот со Софија, Аналитичари: Историјата се злоупотребува за да се манипулира со емоциите на луѓето“
СТАВОВИ
Морализирањето заради штетата по правниот поредок со донесувањето на новиот закон е само тресење на вината од себе, како куче кога ги тресе болвите. Непоправлива штета на правниот поредок направи Груевски со сесрдна поддршка од правниот факултет и отровно корумпираните медиумски лигуши. Уште поголема штета направивте вие, кои сега морализирате, а 2016 им дадовте четириесет и кусур пратеници на бандата која претходно ја бутна државата на колена, пишува Горан Волкановски во колумната „Меѓу лажниот морал и компромисот со злото“.
СЛОБОДНА ЗОНА
Шефот на ВМРО-ДПМНЕ се однесува крајно неразумно, исто колку што се неразумни наративите што ги создава партиската пропагандна кујна со години наназад. Сепак, пропагандата е толку интензивна, така што во јавноста се наметнува впечатокот дека земјата е во хаос, и дека институциите не функционираат и дека единствен спас за земјата е токму тој, пишува Џабир Дерала во колумната „Единствена опција на Мицкоски е бескрајна блокада и предизвикување хаос“.
Д. Мишев
