ВЕСТ НА ДЕНОТ
Потпишан договорот за заем од 500 милиони евра со унгарската Експорт – импорт банка
Во Будимпешта е потпишан договорот за заем со унгарската Експорт-импорт банка. Во име на Владата, договорот го потпиша министерката за финансии Гордана Димитриеска-Кочоска.
Заемот, според министерката, се обезбедува по поволни услови, со рок на отплата од 15 години, со вклучен грејс период од 3 години и каматна стапка од 3,25 проценти.
– Одлуката на Владата да го обезбедиме планираното надворешно задолжување со Буџетот за 2024 година преку билатерален заем од Унгарија, наместо со издавање нова еврообврзница, произлезе како резултат на поволните услови што ги добивме и заштедата што ја правиме само по основ на каматата. Каматните стапки по кои би ја добиле оваа сума на меѓународниот пазар е околу 6 проценти и тоа е голема заштеда по буџетот по овој основ, односно заштеда на годишно ниво од околу 14 милиони евра. Дополнително и рочноста дава предност и помал ризик од потреба за рефинансирање, посочила Димитриеска-Кочоска, посочувајќи дека ваквите услови се резултат на политиките што ги води Владата, за што минатата недела е добиена потврда и од кредитната агенција „Фич“.
ИЗЈАВА НА ДЕНОТ
Касами: Уставните измени ќе се донесат, чекаме јасен план за евроинтеграциите
„Уставните измени се само предуслов за продолжување на евроинтеграциите, но за понатамошните интеграции потребен е партнер од страна на ЕУ со јасен план за нашиот пат кон ЕУ. Чекаме Брисел да дојде со јасен план како ќе продолжи процесот на интеграција“, рече Касами во синоќешното гостување во емисијата „Клик плус“ на Телевизија 21.
РЕГИОН
Албанската полиција уапси двајца опозициски пратеници по синоќешните насилни протести во Тирана
Полицијата во Тирана кривично ги гони пратениците Газмент Барди и Фламур Нока како и организациониот секретар на Демократската партија, Ервин Минароли, по протестот на опозицијата во понеделникот вечерта.
СВЕТ
Рекордни руски загуби во Украина, само во борбите кај Авдиивка Москва загуби најмалку пет дивизии
Одбранбеното разузнавање на Обединетото Кралство објави нов рекорд за просечните дневни загуби на руските сили во Украина во септември 2024 година, што ги означува највисоките бројки регистрирани од почетокот на целосната инвазија, пренесува Украинска правда според ажурираните податоци на одбранбеното разузнавање на ОК објавени на X (Твитер) од 7 октомври.
ГРАЃАНСКА АКЦИЈА
ПРАШАЊЕ НА ДЕНОТ: Дали и каде има мито и корупција во земјава?
СЛОБОДНА ЗОНА
„Актуелната министерка за образование Весна Јаневска е докажан дисциплиниран извршител на партиските задачи. Тоа се покажа за прв пат во рушењето на започнатиот Попис на населението во 2011 година. Но сега во прашање е образованието – тврдо и нечувствително ги урива социјалните договори со просветните работници, ја води ситуацијата кон можен генерален штрајк во таа област. Не се воздржува ни од закани за „вишокот на наставници“ од 3.000 наставници! А за отсуството на асистенти на децата со посебни потреби и да не се говори – нема изговор што може да ја оправда пред јавноста“, пишува Љубомир Костовски во анализата „Патолошки рез во образованието“.
*
Една година крв, солзи, болка, разурнати домови, уништени детски соништа, уништена инфраструктура, разурнати училишта, градинки и болници со илјадници мртви цивили, жени, деца, бебиња… Млади луѓе наместо да се забавуваат и да уживаат во животот, се убиени, масакрирани, киднапирани, силувани, малтретирани, држени како заложници и затворени во некои темни и мрачни подруми и кафези… Една година по нападите на 7 октомври (2023), војната продолжува да беснее меѓу Израел и Хамас во Појасот Газа. И покрај напорите да се постигне дипломатско решение за мир, борбите сега се проширија и во Либан, пишува Дехран Муратов во анализата „КРВАВА ХРОНИКА: 365 дена војна во Газа – неизмерно страдање и смрт на цивилите“.
*
„Владата на Мицкоски се испофали со сопствените успеси кои само власта ги гледа. Целосно оддалечување од патот кон ЕУ, наводна „дестабилизација“, пораст на насилниот криминал, загрозување на социјалната стабилност на граѓаните, национализам и сомнително кредитно задолжување – се дел од оценките на експертите и аналитичарите. Ова е своевидна хроника на 100-те дена влада на Мицкоски кои го откриваат нивниот стил на владеење во претстојниот период“, пишува Биљана Јордановска во анализата „100 ДЕНА ВЛАДА: Меѓу изговорите и пофалбите за сопствените успеси – оддалечување од ЕУ и враќање кон минатото“.
Д. Муратов
