ВЕСТ НА ДЕНОТ
Фудбалски младински натпревар заврши со физичка пресметка
Осум дена притвор во кумановскиот затвор доби 43 годишниот родител од Скопје, кој вчера на фудбалскиот натпревар на фудбалерите од генерација 2009-2010 година меѓу клубовите „Шкупи“ и „Брегалница“ на стадионот „Бело Брдо“ во Штип физички напдна двајца малолетни фудбалери. Оваа пресуда доаѓа по вчерашниот тежок инцидент во Штип на натпреварот на младинските екипи (генерација 2009-2010) на Брегалница и Шкупи од Чаир, во кој беа повредени две малолетни лица.
Повредените лица се фудбалери на Брегалница, а како што соопштуваат од МВР, родител на фудбалер од ФК „Шкупи“, физички ги нападнал и им нанел повреди. Веднаш по нападот, полициски службеници од СВР Штип го лишиле од слобода, а малолетниците биле пренесени во Клиничка болница Штип за укажување помош. Известен е јавен обвинител и се преземаат мерки за целосно расчистување на настанот, по што ќе бидат поднесени соодветни пријави.
ФК Шкупи, ФК Брегалница и ФФМ го осудија инцидентот – кој претставува неприфатливо и грубо нарушување на спортскиот дух, фер играта и безбедноста на младите фудбалери, инцидент кој не смее веќе да се повтори.
ИЗЈАВА НА ДЕНОТ
„Од никого немаше таква најава. На избори ќе одат со потписи. Ќе гледаме, во меѓувреме ако оваа недела има разговори. Но, немаше најава од ниту еден од координаторите дека ќе има нов обид. Имаше обид заеднички да донесеме, имаше најава во координација со сите политички партии. Прекршната точка дали да ја свикаме седницата или не беше тоа што ако не ја свикавме седницата тоа ќе значеше дека Собранието не пробало да го донесе тоа и требаше да се знае кој го блокира тоа. Сакавме да ги искористиме сите можности и последната шанса да се донесе тоа. Се почитуваат сите правила на игри. Тој Изборен законик што го имаме, со тој ќе одиме на избори“, изјави собранискиот спикер Африм Гаши.
РЕГИОН
Предвремените претседателски избори во Република Српска ќе бидат распишани најдоцна следната седмица
Предвремените претседателски избори во Република Српска најверојатно ќе бидат распишани во текот на оваа или најдоцна следната седмица, објавија медиумите во Босна и Херцеговина. Повикот е испратен врз основа на одлуката на Централната изборна комисија (ЦИК) на БиХ од 6 август 2025 година, со која е утврден престанокот на мандатот на Додик.
СВЕТ
Четири новинари меѓу 15-те загинати во израелскиот напад врз болница, велат официјални лица од Газа
Најмалку 15 лица, вклучувајќи четворица новинари кои работат за меѓународните медиуми, се пријавени како убиени во израелски напад врз болница во јужниот дел на Појасот Газа. Ројтерс соопшти дека еден од нивните сниматели бил убиен во нападот во болницата Насер. Се наведува дека другите тројца работеле за Ал Џезира, Асошиејтед Прес и НБЦ.
ЛОКАЛНИ ИЗБОРИ
Во Северна Македонија иако секогаш е навидум јасно, сепак, во рамки на законската легислатива понекогаш е тешко да се разграничи кампања од пропаганда, бидејќи дел од партиите користат позитивни пораки и програми, но истовремено прибегнуваат и кон манипулации – особено преку медиуми блиски до нив. Дознајте повеќе за „Каде завршува информирањето, а каде почнува пропагандата, што е што во изборен контекст“.
СЛОБОДНА ЗОНА
„Војната на Путин против Украина е војна против демократијата – и тоа е војна што тој не може да ја добие. Агресијата на Кремљ го урна мирот, но борбата на Украина ветува дека тиранијата ќе падне. Украина не се скрши. Таа стои исправена. Нејзиниот народ издржува воздушни напади, мрак и загуби, но одбива да се предаде. Војници на фронтот, семејства разделени со егзил, деца кои учат во подземни засолништа – сите сведочат за нација што не го брани само својот простор, туку и самата идеја за слобода. Светот сведочи за тоа секој ден“, пишува Џабир Дерала во „Тој ќе изгуби – светот ќе биде слободен“.
Подготви: Б. Јордановска
