ВЕСТ НА ДЕНОТ
24 години од потпишувањето на Охридскиот рамковен договор
Во Владата денеска се одржа свечена седница за одбележување на 24 години од потпишувањето на Охридскиот рамковен договор. На седницата се обратија премиерот Христијан Мицкоски и вицепремиерот Изет Меџити. Мицкоски изјави дека овој рамковен договор е долго злоупотребуван за жал од поединци, над 20 години од структури кои го користат национализмот како најдобра прекривка за заштита на криминалот и личните интереси. Меџити од друга страна изјави дека договорот не е само законска обврска туку политичка и морална мисија. Последица на формалната еднаквост е половичниот Закон за употреба на албанскиот јазик кој е оспорен пред Уставниот суд, но и механизмот на балансирачот кој беше укинат токму од Уставниот суд, изјави Меџити.
Со Охридскиот рамковен договор беше ставен крај на неколкумесечниот конфликт во земјава во 2001 година. Договорот беше потпишан на 13 август 2001 година во претседателската резиденција на Водно во Скопје од страна на тогашниот претседател на државата Борис Трајковски, тогашниот премиер и лидер на ВМРО-ДПМНЕ, Љубчо Георгиевски, како и тогашните лидери на СДСМ, Бранко Црвенковски, на ПДП, Имер Имери и на ДПА, Арбен Џафери. Потписи на договорот ставија и специјалните претставници на ЕУ и на САД, Франсоа Леотар и Џејмс Пердју.
ИЗЈАВА НА ДЕНОТ
„Нема да го напуштиме Донбас. Не можеме да го направиме тоа. Сите го забораваат првиот дел – нашите територии се нелегално окупирани. За Русите, Донбас е отскочна даска за идна нова офанзива. Ако го напуштиме Донбас по своја волја или под притисок, ќе започнеме трета војна. Зошто? Крим дефинитивно беше отскочна даска за офанзива против југот на нашата земја. Донбас дефинитивно беше отскочна даска за нештедење на украинските граѓани, некористење на нашите, немобилизирање (жалам што го кажувам ова, но така е) и претворање на сепаратистите во руска армија“, изјави украинскиот претседател Володимир Зеленски.
РЕГИОН
За десет години 2,5 милиони луѓе го напуштиле Западен Балкан — регионот ризикува пад од над 15 отсто од населението до 2050
Во изминатите десет години, над 2,5 милиони луѓе го напуштија Западен Балкан во потрага по подобар живот, покажуваат податоците на Светската банка…
СВЕТ
Митинзите планирани во центарот на Анкориџ во пресрет и на денот на претстојниот самит меѓу американските и руските лидери испраќаат јасни пораки до Доналд Трамп и Владимир Путин, кој, велат организаторите, нема место на американска почва. Митингот ќе се одржи во трговскиот центар Midtown Mall, кој се наоѓа во центарот на Анкориџ, на двете најпрометни раскрсници во градот. Вкупно, на истата локација се планирани два митинзи пред самитот.
АЛ ПРЕС
Редакциски избор од албански медиуми: Затворањето на албанската телевизијата „Њуз24“ испраќа загрижувачки сигнал; Само пет хеликоптери ги гаснат огромните пожари во Албанија; Експлозија во јужна Митровица
ПРАШАЊЕ НА ДЕНОТ: Што мислите за Охридскиот рамковен договор, 24 години по потпишувањето?
ИНТЕРВЈУ
Психологот Фики Гаспар во интервју за ЦИВИЛ Медиа одговара на прашања поврзани со влијанието на политиката и злоупотребата на децата и младите за политички цели, кои се причините за врсничко насилство, како и за тоа што треба да се преземе во врска со овие прашања?
АНАЛИЗИ
„И по 24 години од потпишувањето, Охридскиот рамковен договор останува да биде камен на сопнување за меѓуетничките односи и соживотот во Северна Македонија. Негативните коментари и потпалувачки наративи особено добиваат на гласност за време на (пред) изборните кампањи, како што е случајот и сега, пред почетокот на кампањата за локалните избори закажани за 19 октомври“, пишува Драган Мишев во „И по 24 години од потпишувањето, Рамковниот договор се користи за потпалување на националистичките страсти пред изборите“.
Подготви: Б. Јордановска
