ВЕСТ НА ДЕНОТ
Старт на локалните избори со општински долгови од 64,7 милиони евра
Дури 22 општини во земјава се рангирани во 100 те најзадолжени субјекти и на локално и на централно ниво. Општините во државата ја стартуваат изборната кампања со доспеани а неплатени обврски во износ од 64,7 милиони евра – сума која е зголемена и на квартално и на годишно ниво. Додека на локално ниво се набројуваат проекти вредни стотици милиони евра, вклучувајќи ги 250 милиони евра од Унгарскиот кредити, буџетските биланси на општините покажуваат дека скоро сите се на листата “должници“ – со доспеани а неплатени обврски. Според податоците од Министерството за финансии 22 општини се рангирани во групата на 100 најзадолжени субјекти на ниво на целата држава.
ИЗЈАВА НА ДЕНОТ
„Претседателот на Владата во неколку наврати јавно изјави дека по завршувањето на изборите, односно со почетокот на Новата година се очекува да има конкретни чекори во надминување на спорот со соседна Бугарија. Мислам дека во моментов, бидејќи се наоѓаме во изборна кампања се што ќе кажеме може да се стави во одреден контекст и да го наруши и да му наштети на процесот. Тоа што е битно и што е главната порака на ваквите изјави е дека кај премиерот и кај Владата постои сериозна одлучност и заинтересираност после изборите да се направат конкретни чекори за надминување на овој проблем. Тоа што можам сега да кажам е дека има размислувања за тоа какви чекори треба да се преземат, но целиот фокус сега е на изборната камапња и не може да се очекува тие размислувања да добијат форми на конкретни предлози , изјави денеска министерот за европски прашања Орхан Муртезани.
РЕГИОН
Српската полиција изврши проверки во дел од училиштата, дојавите за бомби се лажни
Министерството за образование на Србија објави дека екипите на Министерството за внатрешни работи извршиле увид во некои од училиштата до кои биле испратени пријави за бомби и дека е утврдено дека сите дојави се лажни.
СВЕТ
САД ќе ѝ обезбедат на Украина разузнавачки информации за ракетни напади со долг дострел врз енергетската инфраструктура на Русија, изјавија американски претставници, додека администрацијата на Трамп размислува да му испрати на Кијив моќно оружје кое би можело да постави во дострел повеќе цели во Русија.
ПРАШАЊЕ НА ДЕНОТ: Што мислите за многудетноста како највисок патриотски чин?
ЦИВИЛНИ АКТИВНОСТИ
ЦИВИЛ – Центар за слобода, како коосновач на Глобалната иницијатива за одбрана на демократијата (Defending Democracy Global Initiative – DDGI), ќе биде дел од јавниот настан „Одбрана на демократијата и човековите права – Од препораки кон акција“, што ќе се одржи вечерва, 2 октомври 2025 година во Рим.
Програмата, закажана од 18:30 до 20:30 часот по средноевропско време, ќе вклучува промоција на книгата „Одбрана на демократијата и човековите права– со извештаи и препораки за политики, која потоа ќе биде проследена со дискусија.
Подготви: Б. Јордановска
