ТЕМА НА ДЕНОТ
Меѓународна конференција за човекови права „Слобода или страв“
Во Кијив, Украина, денеска и утре се одржува Меѓународната Конференција за човекови права „ Слобода или страв“, по повод 75 години од усвојувањето на Универзалната декларација за човековите права. На конференцијата се учесници високи политички претставници од ЕУ, кои ќе се обратат сосвои говори во текот на дводневната конференција.
Украинскиот омбудсман Дмитро Лубинец зборуваше во контекст на загубите од руската агресија врз Украина најголеми жртви се децата. „Ако вратиме по едно дете на ден, ќе ни бидат потребни 55 години да ги вратиме сите деца што се киднапирани од окупираните делови на Украина“, истакна Лубинец.
„Ова е еден од најзначајните настани поврзани со 75 годишнината од донесувањето на Универзалната декларација за човекови права. Едно од најтешките воени злосторства е киднапирањето и депортирањето на илјадници деца. Оваа конференција е гласен потсетник дека руските агресори масовно го извршуваат токму ова злосторство”, изјави претседателот на ЦИВИЛ, Џабир Дерала, кој денеска и утре присуствува на Конференцијата за човекови права „Слобода или став“, во Кијив Украина. На конференцијата, како претставник од Северна Македонија, учествува и заменик омбудсманот Јован Андоновски.
Амбасадорката на Украина во Северна Македонија, Лариса Дир, се заблагодари на Дерала и Андоновски за учеството на Меѓународната конференција „Слобода или страв“ што се одржува во Кијив.
За време на Конференцијата рускиот агресор не го поштеди главниот град на Украина, кога во градот се наоѓаат голем број делегации од целиот свет.
ИЗЈАВА ЗА ДЕНОТ
„Констатација на Народниот правобранител е дека скоро сите помалубројни заедници се застапени со скоро идентичен процент на вработени како и изминатите години, што значи дека институциите не ги почитуваат во целост препораките на Народниот правобранител, а со тоа и не ги спроведуваат одобрените годишни планови за вработување во кои е изразена етничката застапеност и спроведување на уставното начело на соодветна и правична застапеност“, изјави Народниот правобранител Насер Зибери презентирајќи ги Посебниот извештај за следењето на примената на начелото на соодветна и правична застапеност во јавниот сектор и Посебниот извештај од анализата на податоците за полова и образовна застапеност за 2022 година.
ВОЈНА ВО УКРАИНА
Четири лица поврзани со руската војска беа вчера обвинети од Министерството за правда на САД за воени злосторства, како измачување, нехуман третман и незаконско затворање на американски државјанин.
*
Американскиот секретар за одбрана Лојд Остин вчера изјави дека барањето на американскиот претседател Џозеф Бајден до Конгресот за дополнително финансирање кое вклучува воена помош за Украина и Израел, исто така ќе биде од корист за американската индустриска база.
КОНФЛИКТИ
Во истрагата на Амнести интернешенел се тврди дека во два израелски воздушни напади во Газа во октомври, во кои се вели дека биле убиени 43 цивили, бил користен систем за наведување оружје произведен од САД.
*
Европската унија треба да размисли за заострување на санкциите кон Хамас и воведување санкции за израелските доселеници одговорни за насилството на Западниот Брег, соопшти дипломатската служба на Европската унија во документот подготвен за состанокот на шефовите на дипломатиите на блокот.
ФЛЕШ ВЕСТИ
ОДЛУКА Малтешкото Министерство за надворешни работи му ја прекина функцијата почесен конзул на Малта на поранешниот вицепремиер, Кочо Анѓушев, поради неговото поместување на „црната листа“ на САД, објави „Тајмс оф Малта“.
ОЦЕНКА Министерството за одбрана е прворангирана институција во Северна Македонија и во регионот според најновиот извештај согласно Индексот на отвореност на Фондацијата Метаморфозис.
СОБРАНИЕ Политичките партии генерално се запознаени со правата на лицата со попреченост, но немаат функционери со попреченост, оценија учесниците на денешната тркалезна маса на тема „Политичко учество на лица со попреченост“ одржана во Собранието на Република Северна Македонија.
АЛ-ПРЕС
Редакциски избор од албански медиуми: Албанската опозиција повторно со нереди во собранието; изгласан буџетот среде хаос; Интерпол распиша потерница по Радоичиќ
АНАЛИЗИ
„Улогата на таткото на една од жртвите, Вања Ѓорчевска, веднаш беше најслабата алка во сите теории. Секој ќе се запраша – па ако се монструми оние кои се учесници во грабнувањето на девојчето Вања, што ли ќе се рече за наведувачот, кој е нејзин родител? Токму тој факт беше шокантен и за регионот – белградските новинари се прашуваат „како тоа татко да ја ’типува’ својата ќерка?“ Инаку секој скопски таксист ќе ви кажеше веднаш и пред осознавањето на осомничените дека токму родителот има биографија која укажува на неговата вмешаност. Засега да кажеме толку, со тоа што се чини дека сликата за наводната семејната хармонија (на разделените родители!) што доаѓаше од домот на жртвата, можеше да влијае на брзината на истрагата и на неможноста навреме да се редуцираат насоките на трагачите!“, пишува Љубомир Костовски во анализата „Монструми под знамето на вергина“.
Подготви: Б. Јордановска