пишува: ЏАБИР ДЕРАЛА
Групата на Мицкоски е во засилена секојдневна координација, поточно, под команда на „азилантскиот шатор“ во Будимпешта. Во сета врева и скандали што се секојдневно ги продуцираат турбо-фолк (техничките) министерки и министри во владата, веќе уморната јавност не успева да препознае што ѝ се случува пред носот, а за подземјето и да не говориме.
Но, јавноста има право да знае! Пратеничките и пратениците во македонскиот парламент се под напад од криминалните структури. Важни се сите сознанија за гротескните и подеднакво насилнички постапки и скандалозно однесување и злоупотреби на националистите и турбо-фолкерите. Но, уште поважно е како сето тоа ќе заврши и дали државата ќе успее да се извлече од продолжената серија удари под појасот што ги добива правосудниот систем.
Јавноста, македонските граѓанки и граѓани имаат право да знаат што се случува со нивната држава. Намерно или ненамерно, јавноста „пропушти“ да види дека во тек е подземен атак на правната држава. За што се работи?
Како што дознавме деновиве, се разгорува подземната кампања чија мета е парламентарниот состав – да не се изгласа Законот за јавно обвинителство. Не е важен бројот на пратеници што се нападнати. Еден нападнат пратеник е како да е нападнато целото Собрание. Не е важно дали некој ги сака или не ги сака, се работи за напад врз демократијата. Пратениците кои сакаат да бидат тоа што се, избраници на граѓанките и граѓаните, чиј фундамент е обврската и правото да гласаат по своја волја, се под невидени закани – тоа е важно. Тие не се под притисок на јавноста или лоби групите што би се обиделе да ги убедат да гласаат вака или онака, туку се нападнати и се соочуваат со теророт што е под диктат на будимпештанскиот азилант.
Дознавме дека во тек е кампања со секојдневни телефонски повици и пораки со закани по животот на пратениците, но и со гнасни закани по имотот, честа, безбедноста и животот на нивните семејства. Ете, тоа ни се случува! Заканите со крвава одмазда можат да се видат и на социјалните мрежи, на графитите што се пишуваат во непосредна близина на домовите на пратениците на македонското собрание. Телефонските повици и пораки се најдиректниот атак со кој се соочуваат луѓето од кои се очекува да ја зацврстат правната држава со својот глас за Законот за јавно обвинителство.
Началството на партијата што ја држеше македонската држава под тешко заробеништво, во изолација, сиромаштија и страв, со криминал и насилство, не сака да оди в затвор. Тоа е единствениот мотив, тоа е императив на целокупното политичко дејствување овие години.
Неспоредлив е теророт што го спроведува политичкото радикално и антизападно подземје на чело со Груевски и Мицкоски деновиве со оној пред една година, кога се обезбеди македонската иднина во НАТО и ЕУ, по усвојувањето на уставните измени соодветни на историскиот договор за надминување на грчко-македонскиот спор со кој нашата земја се врати на мапата на светот. Што значи тоа? Се разбира, јасно е дека името и не им значело ништо, ниту пред една година, ниту било кога во минатото. Ниту името, ниту идентитетот и јазикот им биле важни. Но, паничниот страв од одењето в затвор и осудите за нови судски предмети за тешките криминали, ги покрена структурите од раководството на ВМРО-ДПМНЕ да посегнат по директни и индиректни, но секако тешки и нечовечни закани по пратеници кои одлучиле да гласаат за законот што ќе го крене правосудството од мртвите.
На луѓето на Груевски и Мицкоски мора да им се застане на патот. Тоа е исто како да кажеме дека на криминалот, насилството и распадот на државата мора да им се застане на патот. Неказнивоста и дивеењето мора да престанат еден ден.
Добро утро.
Сите права се задржани. Услови за користење, авторски права и заштита на приватноста.
