Веројатно, погрешно толкувајќи ја функцијата пратеник, од позиција на моќ, Абдула Салиу од Алијансата за Албанците, при влез во земјава на граничниот премин Блаце, вечерта на 27 февруари, не сакал да чека во редицата возила, како и останатите. Тој се качил на тротоарот со својот Фолкваген Пасат, ги поминал возилата што чекале во редицата, ја одминал кабината на пограничната служба и се довезол до просторот каде што се врши царина, објави Фронтлајн претходно.
Кога пограничниот службеник му пришол на возилото на пратеникот Салиу, настанала драма. Пратеникот излегол од возилото и му се развикал на службеникот, велејќи му дека е пратеник во Собранието на РСМ и дека за него не важат стандардните процедури при премин на границата.
Раководителот на пограничниот премин се обидел да ја смири ситуацијата и да ја објасни процедурата за премин на граница, но Салиу продолжил со викање, велејќи дека тој никаде низ Европа не чекал на граница и ниту, пак, тука ќе чекал. Рекол и дека никој ништо не му може.
Од МВР ги потврдија информациите.
Службениците го предупредиле пратеникот Салиу дека ќе биде поднесен службен поднесок во врска со неговото однесување. Според потврдата од МВР, против пратеникот Салиу ќе бидат поднесени пријави по член 4 од Законот за прекршоците против јавниот ред и мир, по Законот гранична контрола (избегнување гранична контрола) и по Законот за безбедност на сообраќајот на патиштата (престигнување колона).
За интернет медиумите на албански јазик, Салиу го потврдил инцидентот, но со свои зборови: „Полицаецот не прифаќаше да ги земе документите, ми ги исфрли на земја и ми рече сам да влезам кај шефовите. По одредено време, ги зеде и ги испрати за контрола. Излегоа Ќамурам Харединовски и Агим Барди. Повикаа уште ефен шеф и му кажаа дека сум пратеник на опозицијата. Ми рекоа дека наводно сум прекршил правилник и ми се заканија дека ке ми пишат опомена и дека ќе испратат известување во канцелариите на МНР. Потоа ми рекоа: Нема врска што си пратеник, ако сакаме ќе ти завршиме работа, ако не сакаме, ќе те држиме тука“.
За ЦИВИЛ МЕДИА, пратеникот изјавил дека нема што да додаде. „Тие (МВР) прават како што сакаат самите“ – беше неговиот краток коментар.