Локалните и државните институции остануваат глуви на барањата на штипјани, да не се гради приватен хотел, во единствениот парк „8-ми Ноември“, што се наоѓа во урбана штипска населба. Како што не информираше граѓанскиот новинар, Горан Трајков, граѓаните протестираа од декември минатата година, а нивните барања, петиции, кривични пријави до Основното јавно обвинителство не се земени предвид. Локалната власт не го стави нивното барање ниту на дневен ред .
Горан Трајков, кој е член и на граѓанската иницијатива „Стоп!, за ЦИВИЛ Медиа изјави, „поднесовме две кривични пријави, во декември и јануари и се уште, еве веќе осум месеци нема никаков одговор од Основно јавно обвинителство. Од Министерството за транспорт и врски,соопштија дека документите што им ги испративме се на разгледување,а од Државниот инспекторат и натаму молчат. Петицијата до Советот, никогаш не беше ставена на дневен ред, зашто како што ни одговорија, ‘Советот не е надлежен за тоа’“.
Тој истакнува дека Уставниот суд се смета за ненадлежен затоа што, за ова спорно земјиште има две спротивставени урбанистички решенија, два спротивставени подзаконски акта.
„Се поставува прашањето врз основа на што, Советот на Општина Штип, донел правилник во делот на спорните одредби, а не е ни спроведена постапка за пренамена на конкретните парцели“, објаснува Трајков.
Во знак на незадолство, штипјани според најавите ќе ги продолажат протестите. Секоја среда со почеток во 20:00 часот ќе блокираат по една улица, се додека не иницираат конкретна активност на надлежните иституции.
Во текстот што ЦИВИЛ – Центар за слобода го објави на почетокот на годинава, може да ја проследите генезата на овој урбанистички проблем во Штип.
Марија Теговска
Оваа содржина се објавува во рамките на јулскиот циклус од натпреварот „Биди граѓански новинар“ на проектот Граѓански објектив на ЦИВИЛ, поддржан од National Endowment for Democracy. Содржината на овој прилог е минимално редактирана од редакцијата на ЦИВИЛ Медиа, соодветно на концепцијата на проектот и на веб страницата.
