ЦИВИЛ одржa јавен настан на тема „На чија услуга е балансерот“, во Прес студиото на организацијата во Бизнис центарот Палома Бјанка.
На панелот се отворија прашања во однос на балансерот при вработување на административни службеници, а во контекст на процентуалната застапеност на етничките заедници во земјава, (зло)употребата на алатката, и можни решенија како што е понатамошното функционирање, но со поинаква регулација, или отстранување на истата.
Панелот е дел од проектот „Чекор напред кон мултикултурно општество“ кој ЦИВИЛ го спроведува во соработка со Министерството за надворешни работи и европски политики на Големото Војводство Луксембург.
Министерот за информатичко општество и администрација, Адмирим Алити истакна дека балансерот е злоупотребен, но истото може да се среди со нови Закони.
-Средувањето е во стопирањето на злоупотребата на балансерот. Сите знаеме дека оваа алатка се злоупотребува во одредени институции. Понекогаш тоа се прави можеби и од самиот министер, или директор или првиот човек на институцијата, но повеќето од случаите се правени од кандидатот. Имаме слуаеви каде кандидатот во еден одреден конкурс на три работни места аплицира под три различни националности. Со мојот тим имаме разговарано за овој проблем, имаме разговарано и со премиерот, значи сакаме да ја стопираме оваа злоупотреба, изјави на Панелот, министерот за информатичко општество и администрација, Адмирим Алити.
Според министерот ова може да се направи со новите Закони.
-Тоа се Законот за вработените во јавниот сектор и Законот за административни службеници, каде ќе ја задолжиме Агенцијата за администрација, во нивниот софтверски систем, како што е сега полето ЕМБГ затворено, исто така да биде затворено и полето националност, вели Алити.
-Ние како министерство мислиме дека со ова би се средил делот на злоупотребата. Балансерот сметам дека треба им служи на сите граѓани, без оглед на која етничка заедница припаѓаат. Тие треба да имаат аксес во сите институции, бидејќи ние се уште имаме статистики каде што гледаме дека одредена зедница нема ниту 1% застапеност во одредени институции, додава Алити.
Дамјан Варошлија
Камера: Александар Ризински
Реализација: Ариан Мехмети