ТЕМА НА ДЕНОТ
Најавата за проширување на парламентарното мнозинство со Алијансата за Албанците (АА), внатрепартиските во Демократската унија за интеграција (ДУИ), како и повиците Али Ахмети, за формирање на сојуз за обединета Европа, го окупираат вниманието на јавноста. Од сето тоа, сепак, се издвојува изјавата на Ахмети со која, се чини, на повидок е создавање на голема проевропска коалиција на сите партии за да се достигне потребната поддршка за уставни измени во Собранието.
Претседателот на ДУИ Али Ахмети започна серија средби со граѓаните под мотото „Заедно за Европа“. Тој, меѓу другото, пред присутните рече дека без уставни измени не може да се отвори првото поглавје, затоа што скринингот е почнат и следната средба со ЕУ треба да започне во ноември.
„Најдобар начин да ги решиме нашите проблеми е да создадеме сојуз за обединета Европа, и сите да ги смират малку суетите, за што е можно поскоро да ги исполниме обврските дома и барањата од Европа и САД, затоа што треба да работиме за нашата татковина“ – рече Ахмети.
ИЗЈАВА НА ДЕНОТ
Битиќи: Едно општество не е закана по идентитетот, туку шанса за промоција на исклучителната единственост на секој еден
„Она што јас го гледам во глобализацијата не е закана од искоренување на јасното ЈАС, туку шанса за соработка меѓу народите, запознавање, толеранција и промоција на исклучителната единственост на секој еден, шанса да се запознаеме, а со тоа и да се почитуваме. Затоа мораме да продолжиме да работиме за нашето едно општество во чија основа е токму тоа, искрена намера да го запознаеме и цениме другиот и да создадеме безбеден простор да е свој и да добие шанса каква што посакуваме и за себе. Само така вистински ќе го ко-креираме нашето – Едно општество за сите.“, изјави меѓу другото вицепремиерот за економски прашања Фатмир Битиќи, на 11-тата научна меѓународна конференција на тема „Предизвици на идентитетот, културното наследство, одржливиот развој и туризмот, поврзани со новите кризи“ во Охрид.
ВОЈНА ВО УКРАИНА
Осумнаесет лица загинаа, меѓу кои и министерот за внатрешни работи на Украина, откако хеликоптер се урна покрај градинка во источното предградие на главниот град Кијив, јавува ББЦ.
Претседателот на Европскиот совет Шарл Мишел денеска се заложи за испорака на тенкови и повеќе опрема во Украина со цел да се обезбеди уште посилен отпор на рускиот агресор.
Поранешен командант на руската паравоена група „Вагнер“ побара азил во Норвешка откако дезертираше од платеничката група, пренесува Би – Би – Си.
ФЛЕШ ВЕСТИ
МКЦ В.д. директорот на МКЦ, Ванчо Богоев е сменет од својата позиција поради неподлегнување на екстремните притисоци од Генералниот секретар на Град Скопје да потпише вработување за Арбен Шаќири.
КОНФЕРЕНЦИЈА Денеска и утре ќе се одржи меѓународната научна конференција „Предизвици на идентитетот, културното наследство, одржливиот развој или туризмот поврзани со нови кризи“ во организација на Центарот за напредни истражувања, а во партнерство со „MIRAS“ – Социјалната Организација за Поддршка на проучувањето на културното наследство од Баку, Азербејџан, Универзитетот „Ајдин Аднан Мендерес“ од Турција како и списанието „Журнал“ за Глобални процеси од Мајами, Флорида, САД. Медиумски покровител на конференцијата е Цивил Медиа.
СКРИНИНГ Ковачевски упати апел до пратениците дека мора да покажат конструктивност во име на граѓаните и единство за благосостојба на нашите граѓани.
АЛ-ПРЕС
Барањето од група пратеници во албанскиот парламент до Уставниот суд да и се одземе мандатот на пратеничката Олта Џачка денеска е во фокусот на медиумите во Албанија. Косовските медиуми го цитираат Курти од интервју за швајцарски „Блиц“ во однос на повлекувањето на швајцарските војници од земјата, а во Ѓаковица, Хоџа, свештеник, фратар и шеих помируваат три семејства. Ова е дел од изборот на редакцијата на ЦИВИЛ Медиа од албанските медиуми во регионот.
СЛОБОДНА ЗОНА
„Навиките да се шират невистини и дезинформации од центарот за пропаганда на ВМРО-ДМНТР, очигледно ќе продолжат и во оваа година затоа што веднаш после оваа лага за филмскиот фонд на браќата Манаки дојде и нова од пустата желба да се извалка МВР и министерот за внатрешни работи за случајот со бегство на осуденик на издржување на долгогодишна казна.“, извадок од колумната „ВМРО-ДМНТР, односно демантирана, продолжува да го шири вирусот на лаги“, од Зоран Бојаровски.
Д. Тахири
