Градоначалникот на Општина Центар, Горан Герасимовски изрази силна поддршка и интерес за соработка и заеднички активности со ЦИВИЛ како дел од активностите во проектот „Заедно за подобра иднина“, посветен на мултикултурализмот и европските вредности.
„Ние ги поддржуваме сите активности во интерес на сите граѓани“, рече градоначалникот Герасимовски, „подготвени сме да учествуваме во активностите што ги предлагате, во насока на мултикултурализмот и европските вредности. Ја имате нашата поддршка.“
Градоначалникот Герасимовски, како и секретарот на општината, Георги Трајчев, укажаа на специфичното значење на општина Центар и ги поздравија напорите на ЦИВИЛ да придонесат кон идентификување на предизвиците, но уште повеќе кон нивното надминување и отворање на перспективите на мултикултурното општество во кое се негуваат европските вредности.
„Претставници на ЦИВИЛ денеска беа на средба со градоначалникот на Општина Центар, Горан Герасимовски. Во оваа прилика добивме силна поддршка од Општината и градоначалникот Герасимовски. Се подготвуваме да започнеме заеднички активности во рамките на проектот ‘Заедно за подобра иднина’, со поддршка од Министерството за надворешни работи на Големото Војводство Луксембург“, изјави претседателот на ЦИВИЛ, Џабир Дерала по завршување на средбата.
Дерала информираше дека со Герасимовски начелно е договорено организирање настан „Граѓански дијалози за предизвиците и перспективите на мултикултурализмот и европските вредности на локално и национално ниво“, на кој ќе се дискутира за мултикултурализмот и европските вредности, а подоцна, со почетокот на учебната година во септември, за распишување награден конкурс за ликовни творби во основните училишта во Центар.
Досегашните средби со градоначалниците на Куманово, Штип и Општина Центар се дел од серијата средби на ЦИВИЛ со градоначалници. Следната средба се одржува в петок, во Гостивар, со градоначалникот Арбен Таравари.
Б. Јордановска
