Турскиот претседател Реџеп Тајип Ердоган денеска до турскиот Парламент на ратификација поднесе предлог-закон за кандидатурата на Шведска за членство во НАТО, соопшти турското претседателство, објави АП.
Претседателството не објави дополнителни детали.
Ердоган го одложуваше ратификувањето на членството на Шведска, обвинувајќи го Стокхолм дека е премногу мек кон курдските милитанти и другите групи кои ги гледа како безбедносна закана. Турција беше налутена и од серијата протести со палење на Куранот во Шведска.
Инаку, сите 31 сојузник на НАТО мора да го поддржат членството на Шведска, а Турција и Унгарија допрва треба да го ратификуваат.
Во кусото соопштение претседателската служба за комуникации, се наведува дека Ердоган го потпишал протоколот за прием на Шведска во НАТО, кој потоа бил доставен до Големото национално собрание на Турција.
Шведска и соседна Финска го прекинаа својот воен неврзан статус по една деценија откако Путин ја нападна Украина во февруари 2022 година, барајќи заштита од НАТО. Финска се приклучи на воената алијанса во април.
На почетокот на овој месец, генералниот секретар на НАТО, Јенс Столтенберг ја повика Турција брзо да го ратификува членството на Шведска во воената организација.
„Многу сојузници би сакале да видат брз напредок во оваа ратификација. Шведска го исполни она што го вети и сега ни треба ратификација на шведското членство“, истакна Столтенберг за Асошиетед прес по претседавањето со состанокот на министрите за одбрана на НАТО во Брисел.
Г. Т.
