Говорот на омраза за жал е секогаш неизбежна реторика за време на политичките кампањи, вели во изјава за Цивил кандидатката за претседател на државата, Мерсиха Смаиловиќ, предложена од страна на Бошњачки демократски сојуз. Таа додаде дека најчестите коментари во оваа конотација се однесуваат на нејзиниот надворешен изглед и на нејзината верска припадност, но среќна е што нема навреди на етничка основа, што според неа, покажува дека бошњачката заедница во земјава ужива голема почит.
„Не се бира начинот на комуницирање за да се дехуманизира или навреди спротивната страна. Но, и во овој почеток на кампањата не изостанува говорот на омраза и кон спротивниот кандидат и кандидатка, како и кон жените. Па, така најчестите коментари во оваа конотација за мене, се однесуваат на мојот надворешен изглед и на мојата верска припадност. Истата се поврзува со некакви радикални струи или дека со ваква облека не припаѓам во општеството на нашата држава. Тука се и коментарите дека на жената не и е место во политиката, па се користат секакви шовинистички фрази. Генерално, мета на овој говор се сите мои идентитети кои ги носам. Среќна сум што нема навреди на етничка основа, што покажува дека бошњачката заедница во Македонија ужива голема почит“, посочи Мерсиха Смаиловиќ во изјава за Цивил.
Таа информираше дека најмногу негативни коментари има на платформата „Х“, со поранешното име „Твитер“, но подвлече дека социјалните мрежи се еден од најголемите агрегатори на ваков говор, затоа што, како што нагласи, докажано е дека овој говор во Македонија не се санкционира.
Смаиловиќ рече дека и на платформата „Фејсбук“ често има коментари околу нејзината кандидатура за претседател на државата, но посочи дека не станува збор за никакви закани, ниту во пишана, ниту пак во вербална форма.
„Како дел од негативната кампања кон мене, се и нападатите кон мојот сопруг. Па така истиот се спомнува поради својот хуманитарен ангажман кој го имал во минатото но и сега“, вели Смаиловиќ.
Во однос на влијанието на говорот на омраза во собирањето потписи, таа вели дека досега нема пријавени такви случаи, но укажува на други сериозни проблеми околу отежнувањето на овој процес од логистички аспект, давајќи посебен акцент на руралните средини, кои според неа, воопшто не се вклучени во правото да бираат кој ќе оди како кандидат.
„Процесот на собирање има сериозни проблеми. 35-те канцеларии лоцирани во низ целата територија, на државата го прават истиот крајно тежок. Има граѓани кои мора да помнат и по 50 км само за да дадат потпис. Руралните средини воопшто не се вклучени во правото да бираат кој ќе оди како кандидат. Додатно е комплицирано што и Нотарската комора со маил порака, го укина правото на нотарите да излезат на терен во руралните средини и да им овозможат на нашите сограѓани да го дадат својот потпис за кандидатите“, рече Смаиловиќ.
Во однос на нејзините приоритети како претседателски кандидат, во случај ако се избере, таа вели дека нејзиниот фокус ќе биде насочен кон охрабрување и поттикнување на општествено-политичките чинители со цел создавање услови за креирање систем во кој граѓаните ќе се чувствуваат еднакви, сигурни и почитувани.
„Политичката борба на партиите како да заборави да го стави во прв ред граѓанинот и системот во негова служба, а наместо тоа имаме општество во кое граѓанинот е невидлив во системот“, нагласи таа.
Иако според нашиот систем на управување претседателот има ограничени можности во поглед на своето делување доколку имаме в предвид дека ние сме парламентарна демократија, додаде Смаиловиќ, проактивното и промислено делување на претседателот може да биде клучно за општествената кохезија, а неговата реална визија за државата поже да поттикне многу позитивни промени кои би можеле да ги охрабрат другите политички инстанци да работат во таа насока.
Харис Сулејман
