ДРАГАН МИШЕВ
Соочени со серијата неуспеси на надворешно политички план, неколкуте катастрофални потези, дипломатските скандали што ни ги приреди претседателката Давкова, немоќта да го остварат предизборното ветување враќање на старото име на државата, критиките за игнорантскиот однос кон баранителите, непокачувањето на платите, доцнењето со мерките за одбрана на животниот стандард на граѓаните, како и зголемувањето на криминалните активности во земјава, во обид да ги дезавуира овие негативни процеси кои земаа замав, ВМРО-ДПМНЕ го прави она што отсекогаш највеќе го знаела и го правела, да спинува и манипулира.
Така, веќе втор ден куририте ги шират конструкциите и спиновите искажани на прес-конференцијата на пратеникот од ВМРО-ДОМНЕ Тони Јаревски, кој обвинува дека Стево Пендаровски наводно ги излажал граѓаните кога , според Јаревски, глумел скромност дека не сака да отвора канцеларија на Претседателот, туку истото ќе го направи некогаш во иднина.
Дали Јаревски има меморија на златна рипка, надополнета со медиумска неписменост, па не знае да пребара по интернет архивите на медиумите, инаку немаше да излезе со ваков спин, бидејќи ќе видеше дека поранешниот претседател на Република Северна Македонија, Стево Пендаровски, на 14 мај објави дека ќе се откаже од дел од привилегиите кои му следуваат согласно законот, односно, нема да ја користи доживотната пензија, но ќе користи канцеларија со тројца вработени од неговиот поранешен кабинет, како што изјавија тогаш од неговиот кабинет за ЦИВИЛ Медиа.
Со оваа одлука, Пендаровски е првиот претседател на државата кој се откажал, односно нема да ги користи привилегиите по завршување на мандатот, како што тоа го прават сите негови претходници. Можеби токму тоа го збунило Јаревски, навикнат на некои други претседатели кои се уште ги користат бенефициите стекнати како поранешни претседатели, како поранешните претседатели Бранко Црвенковски и Ѓорге Иванов.
Додека уште во септември 2019 година, во Пендаровски најави дека по завршување на мандатот, ќе се откаже од доживотната пензија и другите привилегии, но, и тогаш нагласи дека по истекот на мандатот, смета дека би требало да му се обезбеди просторија во некоја од државните институции каде како поранешен претседател би ги извршувал протоколарните активности.
Тоа што Јаревски не го разбира наводното„лицемерието“ на Пендаровски, очигедно е поради тоа што ги помешал лончињата, или поради неинформираност, или со намера да излаже, кога јавно изјавува дека поранешниот претседател се откажал, па се премислил и веќе на 3 јуни нашол канцеларија и договорил и цена за закуп.
Дури и +инфо, долгогодишен поддржувач на партијата на Јаревски, веднаш објави демант од Пендаровски каде вели дека „Граѓаните лесно ќе заклучат кој е лицемерен. Канцеларијата ми е доделена во јуни, но сѐ уште не е уредена“.
