ВЕСТ НА ДЕНОТ
Одобрени првите кредити на компаниите од унгарскиот заем
Дел од кредитите се веќе одобрени, а поднесени се и барања до Развојната банка за префрлање на средствата, рече денеска министерката за финансии Гордана Димитриоска Кочовска во врска со унгарскиот заем. По средбата со претставниците од Сојузот на стопански комори (ССК), таа повтори дека компаниите кои ќе инвестираат во опрема и производство имаат предност кај банките. Според ССК, унгарскиот кредит е еден од најповолните и претставува скромна, но голема поддршка за фирмите.
ИЗЈАВА НА ДЕНОТ
Мицкоски од Вашингтон: Руската агресија врз Украина треба да се казни
„Македонија е меѓу петте водечки донатори за Украина. Руската воена агресија без преседан против Украина и украинскиот народ, неиспровоцирана од ништо, е нешто страшно. Тоа мора да биде осудено. Треба да направиме сѐ што можеме за да му помогнеме на украинскиот народ и на Украина. Тоа е нашиот став. Зошто? Бидејќи Русија го оспорува и негира украинскиот идентитет и јазик. Тоа е страшно. Страшно“, изјави премиерот Христијан Мицкоски во директна дебата во Атлантскиот совет во Вашингтон.
РЕГИОН
Во Хрватска петти бојкот на трговците и давателите на услуги
Петти петок по ред граѓаните на Хрватска денеска ги бојкотираат маркетите и бензинските пумпи. Организаторот на бојкотот платформата „Ало инспекторе“ упати апел денеска да се бојкотираат и банките и телекомуникациските компании. Советникот на „Ало инспекторе“, Јосип Келемен најави дека платформата ќе доби „бесплатна и моќна алатка за корисниците во надзорот на пазарот“ изработена од хрватските програмери.
СВЕТ
Глобални кризи без решение – состанокот на Г20 во Јоханесбург заврши без договор
Министерите за надворешни работи на групата Г-20 се собраа на дводневен состанок во Јужноафриканската Република (ЈАР), но дискусиите за клучните глобални кризи, како војните во Украина и Газа, не резултираа со консензус. Дополнителна тешкотија беше одлуката на САД да не учествуваат во разговорите
АЛ-ПРЕС
Редакциски избор од албански медиуми: СПАК ја обзнани стратегијата за истрага на изборен криминал; Досега се регистрирани над 160 000 гласачи од дијаспората за изборите во Албанија; Европратениците бараат да се забрза процесот на интеграција за Косово
ПРАШАЊЕ НА ДЕНОТ: Каква иднина има нашата земја на меѓународен план?
АНАЛИЗИ
„Во листата на најдоходовни фирми на земјава трговците на мало се држат одлично, дури и многу подобро од фирми што нашата свест ги прима како гиганти! Истите тие можат да се натпреваруваат и во регионални рамки. Македонските и хрватските трговци се пример за доходовност по вработен што е еден значаен индикатор. Таа моќ не може, а да не се рефлектира и по нивната позиција во однос на извршната власт, што создава сериозна криза во областа на економско-социјалните односи“, пишува Љубомир Костовски во анализата „БЛЕСКАВИОТ КАМЕН ВО КРУНАТА НА ПРОФИТЕРИТЕ: Македонските трговски фирми – меѓу најпрофитабилните во регионот“.
Подготви: Б. Ј.
