Два пациента од Крива Паланка починале на пат кон Ургентниот центар во Скопје! Едниот од нив починал во кумановската болница, а вториот, на наплатната рампа кај Романовце, кога возилото на Итната помош останало во дефект?!
„Невкусно е да се коментира дека пациентите починале поради тоа што се случил дефект на возилото. Како што ми пренесоа дежурните лекари, и двајцата пациенти биле во многу тешка состојба. Едниот е повозрасен пациент, кој имал симптоми на задушвање, а вториот, претходно бил на пресадување бубрег и веројатно, нешто му се искомплицирало. Но, ова се неофицијални информации, утре ќе имаме комплетна слика што се случило“, вели Јоско Стефановски, в.д. директор на Здравствениот дом во Крива Паланка.
Додека трае истрагата за дефектот на возилото на Итната помош кое е старо повеќе од 30 години, вчера на социјалните мрежи се појавија фотографии на кои се гледа како медицинскиот персонал ги злоупотребува возилата за лични потреби.
Викендов е погребана и 31-годишна родилка од Битола, која починала од сепса, откако повеќе од две недели, според ФБ статусот на роднината на починатата, била лечена од стомачен вирус?! Според сведоштвата на социјалните мрежи, причината за нејзината смрт е оставен инструмет при „царски рез“!
Педијатарот д-р Ангелчо Андоновски на својот Фејсбук профил денеска објави слика од родилиштето во Струмица.
„Не дотолчуваа бавно, а брутално. Тој што се нарекуваше министер за здравство, беше всушност, министер за деструктивност и помор! Сакајќи да направи бизнис за ДРПМНЕ-фамилијата и за самиот себе, си ги уништуваше здравствените установи по градовите и привлекуваше сé кон приватните болници, и го доведе здраствениот систем до самото дно! Ова е гинеколошки стол во Струмица каде се фалеше дека прави нешто, а уствари, е едно големо – ништо! Штип нема спирометар во 21 век. Условите се ужасни, а министерот за СМРТ уште се промовира. Колку жалосно и болно!!! За сé што сторивте ќе одговарате“, напиша Андоновски.
Се чини дека хоророт во јавното здравство нема крај.
Додека граѓаните страдаат, министерот Тодоров распиша тендер во вредност од 48.000 евра за испитување на задоволството на пациентите!?
Маја Ивановска