ВЛЕН, коалициониот партнер во владата на Мицкоски, за министер за здравство го предложи Азир Алиу, поранешен министер за информатичко општество и администрација, кадар на Алијанса за Албанците на поранешниот министер за здравство Арбен Таравари. Тој е дипломиран инженер по електротехника, и се стекал со звањето доктор по информатички науки.
Редакцијата на ЦивилМедиа, вчера во редовниот термин го постави „Прашањето на денот: Каков министер за здравство ни е потребен?“
Од пристигнатите одговори на граѓанките и граѓаните може да се издвојат 3 групи:
Еден дел од читателите сериозно го сфатиле прашањето и се потрудиле да дадат суштински одговори според сопствените замисли каков треба да биде министерот за здравство. Тука издвојуваме неколку одговори:
Министер за здравство треба да биде доктор специјалист за организација на здравството,кој ќе се погрижи за организациони реформи во таа област,а тоа ќе доведе до поквалитетна и подостапна здравствена заштита во јавното здравство.
Искусен доктор, повозрасен, кој поминал низ сито и решето во својот професионален развој, почитуван и ценет меѓу пациенти и колеги. Но, да не биде некој врвен специјалист кој би го изгубиле како пациенти. Туку од некоја медицинска област каде има повеќе кадри за да не се забележи неговото отсуство. Истото го мислам и за градоначалници и пратеници. Доктори да не се ставаат, бидејќи ни се неопходни во нашиот здравствен систем.
Медицинско лице, некој врвен доктор, ако се уште ги има, некој што навистина нешто ќе среди, сега ни е катастрофа, за жал се ставаат партиски пиони без никаква врска со медицината, што да се каже.
Да биде од таа струка, лекар, да има познавање и да знае добро да менаџира
Стручен доктор и професионалец кој ја знае потребата на ова здравство
Во втората група влегуваат оние кои преку своите одговори ја прикажуваат разочараноста од моменталната состојба воздравството, без надеж дека нешто ќе се подобри:
Никаков. Бидејќи каков и да ставиме ова што се раскрчми и уништи во овие 33 години, ни господ не го оправа!
И да има и ич да нема исто се фаќа, здравството е дно
Некој од странство,во Македонија нема таков ,способен
Таков се уште не е роден во Македонија. До сега сите беа со лепливи прсти или со успорени реакции или изгубени во просторот и времето.
Додека во третата група, секако откако ќе ги изземеме за среќа малкуте навредливи коментари со говор на омраза, има главно кратки шегобијни одговори, како:
од Тему; здрав; нормален; учител по музичко; може и оперски пејач; магионичар…
Редакцијата на ЦивилМедиа, ги охрабрува граѓанките и граѓаните да дадат свои одговори, пораки и сугестии на прашањата на денот. ЦИВИЛ и е простор во кој секогаш можат да се обратат со свои прашања, коментари, споделување искуства, критики или пофалби.
Сите прашања на денот може да се најдат во рубриката ФОРУМ на интернет весникот ЦивилМедиа.
М. Д.
