Разрешени три заменици министри во кабинетот на Еди Рама, а за оваа одлука се уште нема детални информации од албанската влада, пишуваат албанските медиуми.
Според правниците, целосното конституирање на косовското собрание нема да се реши без политички договор, јавуваат косовските медиуми.
Во продолжение се поместени содржините од денешниот редакциски избор на ЦивилМедиа, од албанските медиуми во регионот.
АЛБАНИЈА
Албеу: Неочекувани потези во кабинетот на Рама, разрешени тројца заменици-министри
На денешниот состанок на Советот на министри, беше одлучено да се разрешат тројца заменик-министри од кабинетот на премиерот Рама.
Во одлуката се појаснува дека Илна Ѓузи, заменик-министерката за туризам и животна средина, заменик-министерот за инфраструктура и енергетика Чено Клоси и заменик-министерката за внатрешни работи Ромина Куко се разрешени од своите должности.
Овие промени во кабинетот доаѓаат неколку дена пред Рама да го свика Собранието на Социјалистичката партија каде што ќе бидат објавени имињата што ќе го формираат кабинетот на владата „Рама 4“. Во меѓувреме, сè уште нема информации во врска со овие одлуки или кој сега ќе ги заземе празните позиции, пишува Албеу.
Јава њуз: Исклучување на опозицијата од „Интеграците“, ЕУ: Членството бара меѓупартиски консензус
Делегацијата на Европската Унија во Албанија со нетрпение го очекува конституирањето на новиот Парламент и структурирањето на парламентарните комисии.
A2CNN ги праша претставниците на ЕУ во Албанија за неофицијалниот предлог на мнозинството да го преземе раководството на Комитетот за интеграција, со што ќе се прекине дво-децениската традиција на водење на комитетот од страна на опозицијата, пренесе Јава њуз.
Во дипломатски одговор, ЕУ тврди дека бара консензус за интеграцијата, имплицирајќи дека раководството на овој комитет треба да остане кај опозицијата.
„Во овој поглед, со нетрпение ги очекуваме конститутивните чекори на новиот парламент и очекуваме дека интеграцијата во ЕУ ќе остане меѓупартиски приоритет за пратениците во новиот парламентарен законодавен дом. За да биде успешно, членството бара меѓупартиски консензус.“
КОСОВО
Бота сот: Целосното конституирање на Собранието е во рацете на Уставниот суд – според правниците, нема решение без политички договор
Правниот тим во Претседателството на Косово спроведува детални анализи на процесот на конституирање на новото Собрание, по контроверзиите што се појавија околу законитоста на неговото завршување. Овој процес беше прогласен за „завршен“ од претседателот на Собранието, Димал Баша, за време на конститутивната седница одржана на 30 август.
Во соопштение за медиумите, Претседателството објави дека претседателката Вјоса Османи се сретнала со претседателот на Собранието, Димал Баша, на 1 септември, каде што детално биле разгледани понатамошните чекори поврзани со целосното конституирање на Собранието, објави Бота сот.
Газета блиц: Албанци во УНМИК биле дел од српските служби, според експерт за безбедност
Експертот за безбедност, Фадил Кајтази, даде силна изјава во емисијата „Рубикон“ на Клан Косова, велејќи дека мисијата на УНМИК, покрај позитивните аспекти, имала и сериозни проблеми со инфилтрациите.
Според него, во оваа мисија биле вклучени и Албанци кои работеле за српската тајна служба, БИА. „Мисијата на УНМИК, покрај големите придобивки што ги донесе и за кои треба да бидеме благодарни, имала и инфилтратори. Голем дел од оние кои биле инфилтрирани биле Албанци, кои биле соработници на српските тајни служби“, рече Кајтази.
Тој нагласи дека овој аспект е еден од најголемите проблеми што ја придружувал меѓународната мисија во Косово, објави Газета блиц.
КОЛУМНА
Алмакос: „Коктел кампања“
„Колку што видовме во оваа кампања што започна рано и пред време, двете албански политички партии сè уште не одлучиле дали ќе спроведат строго локална и општинска кампања или ќе имаат и национален, и меѓународен пристап.
Сè што може да се види досега е дека ВЛЕН е повеќе фокусирана на локални теми и поддршка, како што се овие избори, додека АКИ сè почесто споменува национални теми, дури и меѓународни преку кампањата на Бујар Османи. Не можеме да знаеме или да утврдиме од сега па натаму како ќе продолжи и ќе заврши оваа кампања, за која рековме дека започна рано и пред време, но од она што го видовме, можеме да ја наречеме: коктел кампања!“, пишува Авторот Рамадан Рамадани, во колумната „Коктел кампања“, објавена во дневниот весник Алмакос.
Подготви: Д. Тахири
