Во разговорот со новинарскиот ветеран и политички аналитичар Љубомир Костовски разговараме за објасти кои се наметнуваат како суштински за сегашниот политички и општествен момент во Северна Македонија.
Со Костовски разговараме за актуелната политичка состојба низ призмата на претстојните локални избори – како локалните теми, кои природно се врзани со секојдневните проблеми на граѓаните, се прелеваат во национални и националистички наративи. Мицкоски и неговата партија не можат да ја избегнат оваа динамика – локалните прашања сами по себе се наметнуваат, а за да ги избегнат, функционерите на централната власт се користат со национални митови и националистички наративи, па дури и со вокабулар за геополитички збиднувања, како што се хибридните напади.
Понатаму, Костовски зборува за улогата на Алта банка – мала и сомнителна српска банка која најави целосно преземање на Стопанска банка Битола. Костовски неодамна прв ја отвори оваа тема со ексклузивна анализа за медиумската платформа на ЦИВИЛ. Тој во разговорот анализира како оваа финансиска трансакција која, иако на прв поглед изгледа скромна, носи длабоки импликации за економската ориентација на земјата. Костовски дава одговор на прашањата дали ова значи постепено одвојување од западниот економски круг, односно – дали станува збор за обична деловна зделка или за политички и геополитички проект со цел долгорочна економска зависност од Србија.
Во третиот дел од разговорот, Костовски го анализира концептот на „руско-српскиот свет“ во Северна Македонија. Разговараме за тоа како преку културни, медиумски и економски механизми се одржува и шири овој наратив, и какви последици тоа има врз демократските процеси и евроатлантската иднина на земјата.
Овој разговор со Костовски е богат и критички осврт на преплетот меѓу локалното и глобалното, меѓу економијата и политиката, и меѓу домашните и надворешните фактори кои ја обликуваат иднината на Македонија.
Џабир Дерала
Камера, фотографија и монтажа: Ариан Мехмети
