ВЕСТ НА ДЕНОТ
„Онкологија“: Смрт за пациентите, условна слобода за виновниците – лицето на македонското судство
Две години условна казна за онкологот Мери Пешевска – ова е епилогот на скандалот „Онкологија“. Животи скратени, пациенти лекувани со физиолошки раствор наместо терапија, буџет оштетен за над 2,2 милијарди денари – а судството реши: виновните ќе останат слободни, се додека во следните пет години не направат ново дело.
Дали со оваа пресуда судството им порача на граѓаните дека смртта на десетици пациенти е без тежина, а милијардите можат да се испарат без последици. Жртвите повторно се понижени, а довербата во правдата е симната на нула.
ИЗЈАВА НА ДЕНОТ
Калас: Ситуацијата во Газа претставува катастрофален неуспех на човештвото
Сите европски земји го поддржуваат решението за две држави. Значи, за да имаме две рамноправни држави, преземени се чекори од некои земји членки во врска со признавањето, со цел да се испрати јасен сигнал дека европските земји ги поддржуваат и Палестинците во овој конфликт, изјави високата претставничка на ЕУ за надворешни работи и безбедносна политика Каја Калас.
Според неа, министрите биле јасни во своите ставови дека решението за две држави е најдобрата шанса за траен мир на Блискиот Исток, бидејќи поддршката на овој модел значи дека всушност постојат и Израел и Палестина.
– Тоа значи безбеден и сигурен Израел и одржлива палестинска држава, додаде Калас.
Таа истакна дека актуелната ситуацијата во Газа претставува „катастрофален неуспех на човештвото“ и ја повика израелската Влада веднаш да ги отстрани сите хуманитарни ограничувања.
– Јасно е дека Хамас мора да го положи оружјето и да ги ослободи сите заложници, но и проширувањето на доселеничките населбите и анексијата на територии се некомпатибилни со мирот. Во Европската Унија се обидуваме да го насочиме фокусот кон помагање на луѓето на терен и вистинско подобрување на хуманитарната ситуација. Ние сме најголемиот донатор на хуманитарна помош и силен поддржувач на Палестинската самоуправа, рече Калас.
РЕГИОН
Семејствата на жртвите од „Рибникар“ бараат намалување на старосната граница за кривична одговорност – од 14 на 12-годишна возраст
Семејствата на убиените деца и домарот Драган Влаховиќ во основното училиште „Владислав Рибникар“ во Белград денеска објавија дека ќе поднесат иницијатива до Министерството за правда за ревидирање и намалување на старосната граница за кривична одговорност од 14 на 12 години, преку измени на Кривичниот законик и Законот за малолетни сторители на кривични дела и кривична заштита.
СВЕТ
Приведени 74 лица во Молдавија за изборен заговор поддржан од Русија
Властите во Молдавија приведоа 74 лица обвинети за заговор за поттикнување немири за време на парламентарните избори во земјата на 28 септември, објави локалниот медиум NewsMaker на 22 септември, пренесува Кијив Индипендент.
Осомничените се обвинети за соработка со руските разузнавачки служби за организирање масовни немири за време на изборниот период. Според полициското соопштение, групата се обидела „да создаде хаос и да ја поткопа довербата во изборниот процес во Република Молдавија“.
СЛОБОДНА ЗОНА
„Практиките на партизација почнаа масовно да се вкоренуваат во времето на владеењето на Никола Груевски, кога јавната администрација стана најсигурното засолниште за партиските војници. Со вработувања по партиски клуч, јавните институции се претворија во кадровски резервоари за наградување на лојалност, наместо во професионален сервис за граѓаните. Оваа шема не згасна со промената на власта – напротив, продолжи да живее и да се прилагодува на новите политички елити.“, пишува Дијана Тахири во блиц-коментарот „ Крај на партизацијата во јавната администрација – кабаре што го гледаме три децении“.
Подготви: Д. Тахири
