Дрон на рускиот агресор погоди цивилен автобус во центарот на Никопол, при што загинаа најмалку три лица, а десетици се повредени, соопштија украинските власти.
Според регионалните власти, дронот го погодил автобусот во момент кога се приближувал кон станица, со патници во возилото и луѓе кои чекале на постојката. Бројот на повредени се движи од 12 до 16 лица, од кои дел се хоспитализирани, додека спасувачките екипи работеле на местото на нападот во текот на утрото.
Украинската служба за итни случаи и локалните власти го опишаа нападот како „брутален удар врз цивилен јавен превоз во време на утрински метеж“, кога граѓаните патувале на работа.
Украинската амбасадорка Лариса Дир веста за овој нов брутален напад врз недолжните цивили ја објави на социјалните мрежи.
„Ужасно утро во Днипропетровската област. Како резултат на руски удар врз автобус во самиот центар на Никопол, три лица загинаа, уште 16 се повредени. Во друг реон — како последица на нападот загина дете. Ова е свесен терор против цивилното население. #RussiaIsATerroristState“, напиша Дир.
Ужасно утро во Днипропетровската област. Како резултат на руски удар врз автобус во самиот центар на Никопол, три лица загинаа, уште 16 се повредени. Во друг реон — како последица на нападот загина дете. Ова е свесен терор против цивилното население. #RussiaIsATerroristState pic.twitter.com/ae4NL9aysl
— Larysa Dir (@dir_larysa) April 7, 2026
Зеленски: „Секојдневен терор врз цивили“
Претседателот на Украина, Володимир Зеленски, остро го осуди нападот, оценувајќи го како дел од систематска кампања на терор против цивилното население.
Во својата изјава, Зеленски посочи дека ваквите напади се случуваат „секојдневно“ и дека секој обид за слабеење на санкциите или продолжување на економските врски со Русија е „апсурден во услови на ваков терор“.
Тој исто така предупреди дека цивилите во регионите по линијата на фронтот, особено во јужна Украина, се изложени на постојани напади со дронови и артилерија.
Меѓу другото, украинскиот претседател побара од Москва да престане со нападите барем за време на велигденските празници, на што одговор засега нема.
„Доколку Русија е подготвена да ги запре нападите врз нашата енергетска инфраструктура, ние ќе бидеме подготвени да одговориме со иста мера. Овој предлог, пренесен преку Американците, веќе ѝ е презентиран на руската страна“, рече украинскиот лидер во јавно обраќање доцна во понеделникот.
Ескалација наместо примирје
Нападот врз автобусот во Никопол доаѓа во период на интензивирани руски удари низ Украина, и покрај повиците за привремено примирје за време на православниот Велигден.
Според меѓународни извори, руски напади врз цивилни цели, вклучително и јавен транспорт и пазари, продолжуваат со висок интензитет. Во последните денови, повеќе напади во регионот на Днипро и други делови од Украина резултираа со десетици жртви и повредени.
И за овој напад е покрената кривична постапка за воени злосторства, соопшти Канцеларијата на генералниот обвинител на Украина, објави Њујорк Пост. „Откако рускиот моќник Владимир Путин ја започна својата целосна инвазија пред повеќе од четири години, канцеларијата има документирано повеќе од 210.000 такви случаи“, се вели во текстот на американскиот весник.
Намерно таргетирање цивили
Украинските власти и независни набљудувачи сè почесто предупредуваат дека нападите со FPV-дронови врз цивилни цели – како автобуси, пазари и станбени области – укажуваат на намерно таргетирање на цивили.
Никопол, град во близина на фронтовската линија, редовно е изложен на артилериски и дронски напади, што го прави еден од најранливите урбани центри во регионот.
Нападот врз автобусот во Никопол уште еднаш ја нагласува суровата реалност на руската агресија: цивилите остануваат директна мета.
Во услови на дипломатски напори и повици за примирје, ваквите удари испраќаат спротивна порака – дека ескалацијата продолжува, а цената ја плаќаат обичните луѓе.
Џ. Дерала
