Скопје / Кијив, 5 мај 2026 – Ден 1532 од руската целосна агресија врз Украина е одбележан со нов масовен комбиниран напад со ракети и беспилотни летала, насочен кон критична енергетска инфраструктура и цивилни цели, при што загинаа најмалку пет лица, меѓу кои и спасувачи кои пристигнале да помогнат.
Според украинските власти, Русија во текот на ноќта лансирала 11 ракети и 164 дронови, погодувајќи повеќе региони низ земјата. Најтешко погодени се Полтавската, Харкивската и Днипровската област, како и делови од Запорижја и Кијивската област.
Особено вознемирувачки е фактот што руските сили извршиле т.н. „двоен удар“ – повторно гаѓајќи ја истата локација додека спасувачките екипи веќе интервенирале на терен. Во тие напади загинале и припадници на службите за итни случаи.
Претседателот на Украина, Володимир Зеленски, остро реагираше на нападите, истакнувајќи:
„Ноќеска Русите ја нападнаа енергетската инфраструктура во Полтавската област. И многу подло повторно удрија со ракета кога веќе имаше припадници на ДСНС – кои го гасеа пожарот. Во овој момент се знае за десетици повредени. За жал, загинаа четири лица, меѓу кои и двајца спасувачи. Тоа се Херојот на Украина Виктор Кузменко, кој повеќе од 50 пати ги отстранувал последиците од гранатирања, и Дмитро Скрил, кој служел во ДСНС повеќе од 20 години. Моето искрено сочувство до семејствата и блиските.
Имаше напади и во Харкивската област. Четири лица се повредени. За жал, едно лице загина. Моето сочувство до сите. Критичната инфраструктура беше нападната и во Днипровската област. Три лица се повредени. Во Павлоград е оштетена електропреносната мрежа, поради што илјадници семејства останаа без струја. Имаше удари и во Запорижја и Кијивската област, каде што три лица се повредени. Генерално, главната цел на Русија оваа ноќ беа објектите на нашата енергетска инфраструктура.“
Украинската амбасадорка Лариса Дир, која води своевиден дневник на војната со секојдневни објави за најважните настани и изјави, денеска ги сподели основните податоци за најновиот напад на рускиот агресор.
„Ден 1532. Изминатата ноќ рф ја нападна Украина со 11 ракети и 164 дронови, при што уби најмалку 5 лица, меѓу кои и спасувачи кои пристигнале да помогнат. Десетици повредени, уништена инфраструктура на 🇺🇦. Државниот терор на рф продолжува. #RussiaIsATerroristState“
Министерот за надворешни работи на Украина, Андриј Сибига, посочи на лицемерието на Москва која истовремено зборува за прекин на огнот, но не одговара на украинскиот предлог.
„Додека светот го очекува одговорот на Москва во врска со предлогот на Украина за прекин на огнот, кој треба да започне на полноќ меѓу 5 и 6 мај, Русија го демонстрира своето вистинско лице како терорист.“
Ден 1532. Изминатата ноќ рф ја нападна Украина со 11 ракети и 164 дронови, при што уби најмалку 5 лица, меѓу кои и спасувачи кои пристигнале да помогнат. Десетици повредени, уништена инфраструктура на🇺🇦. Државниот терор на рф продолжува. #RussiaIsATerroristState pic.twitter.com/qCJJdl5GXF
— Larysa Dir (@dir_larysa) May 5, 2026
Овие напади се случуваат во момент кога Украина предлага вистински прекин на огнот, но на теренот борбените дејства не запираат. Наместо деескалација, руските напади врз цивилите и енергетската инфраструктура продолжуваат со висок интензитет.
Последниот напад, со директно таргетирање на спасувачки екипи и енергетски капацитети, ја потврдува стратегијата на систематско уништување и сеење терор.
Додека дипломатските иницијативи остануваат без одговор, реалноста на теренот покажува дека војната продолжува со несмалена жестина, а рускиот терор е насочен против цивилите и оние што спасуваат животи.
Џ. Дерала
