Европските лидери покажаа дека се грижат за земјите од Западен Балкан. Лидерите на државите пак, се вратија задоволни од ветените инвестиции во инфраструктурата и енергетиката. Значи, Самитот во Трст беше успешен и ја постигна целта.
„Самитот покажува дека се грижиме за напредокот на земјите од регионот и за нивното приближување кон ЕУ. Политичката стабилност на регионот значи политичка стабилност и за нас“, рече германската канцеларка Ангела Меркел.
За Македонија, Самитот во Трст беше од исклучително значење. Не само поради финасиската помош, туку и поради поддршката од европските политички лидери, особено онаа директно изразена од канцеларката Меркел. Македонската делегација самитот го оцени како успешен.
Според информациите, Македонија доби грантови од околу 70 милиони евра и кредити од околу 200 милиони евра, пари наменети за инфраструктурни проекти.
Премиерот, Зоран Заев истакна дека Македонија е голем добитник во Трст. Одлуката на ЕУ да ја финансира изградбата на делницата Крива Паланка – Бељаковце во должина од 34 километри со 70 милиони евра, ја најави и еврокомесарот Јоханес Хан. Целиот проект се предвидува да чини 152 милиони евра, а останатиот дел од парите, Македонија ќе треба да го обезбеди преку кредит од Европската банка за обнова и развој во вредност од 75 милиони евра.
„Железничното поврзување на Македонија со Бугарија е пример, колку ние сериозно гледаме на оваа агенда за поврзување во регионот“, додаде Заев.
Тој изјави дека Владата ќе се насочи и кон исполнување на обврските околу Договорот за основање енергетска заедница за Југоисточна Европа.
Владата на Заев, на овој Самит доби отворена поддршка и од британскиот министер за надворешни работи, Борис Џонсон, кој на Твитер напиша дека Велика Британија цврсто стои зад неговите реформи.
Во однос на Договорот за транспортната заедница, потпис не беше обезбеден само од Босна и Херцеговина, како дел од нивните внатрешно-политичките проблеми. Овој проект треба да овозможи усогласување на транспортното законодавство на земјите од регионот со ЕУ и да го олесни финансирањето на проектите во таа сфера.
„Се надеваме дека БиХ наскоро ќе биде подготвена да потпише. Штета е што, тоа не можеше да се случи сега“, изјави шефицата на европската дипломатија Федерика Могерини. Таа е со оценка дека се работи за „многу успешен самит“, што донел голем број „практични проекти“.
До 2020 година во регионот ќе се инвестираат околу 1,3 милијарда евра.
Самитот за Западен Балкан во Трст е под покровителство на италијанскиот премиер, Паоло Џентилони и е дел од Берлинскиот процес. Учесници беа шесте држави од Западен Балкан и четирите држави членки на ЕУ: Германија, Aвстрија, Франција и Италија. Годинава на Конференцијата се вклучи и петта држава – Велика Британија, во улога на следен домаќин во 2018 година. Во својство на набљудувачи во процесот остануваат Словенија и Хрватска.
На маргините од Самитот во Трст, се одржаа повеќе настани. Премиерот Заев оствари билатерална средба со албанскиот колега Еди Рама и со премиерката на Србија, Ана Брнабиќ. Се одржа и бизнис форум и собир на организации на граѓанскиот сектор, а се воведе и работилница за антикорпуција и инаугурација на седиштето на регионалните стопански комори.
