Градоначалникот на Општина Ново Село, Блажо Велков, со пцости и навреди ја избркал новинарската екипа на ТВ Вис Струмица, која ја следела седницата на Советот на Општината на која вчера советниците требало да одлучуваат за референдумот за изградбата на рудникот Иловица.
„Бевме на седницата на Општина Ново Село, на која требаше да се донесе датумот за референдум за рудникот Иловица. Влеговме заедно со активистите од иницијативата ‘Здрава котлина’. До моментот кога збор зема градоначалникот на Ново Село, немаше никаков проблем. Градоначалникот, пред своето обраќање, ни се обрати со зборовите: ‘Исклучи ја камерата!’. Мојот колега, камерманот Кире Пиличев, рече дека нема да ја исклучи затоа што е јавна седница. Градоначалникот беше упорен, а советникот на ВМРО-ДПНЕ, почне да нè навредува и да пцуе. Тука веќе реагирав, му реков на колегата да ја исклучи камерата и ја напуштивме седницата. Претседателката на Советот, сметаше дека правиме лошо за референдумот. Дознавме дека е одреден датум за референдумот, но не знаеме точно кој датум. Не се јавивме да прашаме“, изјави за ЦИВИЛ Медиа, новинарката на ТВ Вис од Струмица, Стојна Митева.
На паузата, по прекинот на седницата, новинарката Митева побарала образложение од советникот Божин Јованов од ВМРО-ДПМНЕ, со кое право и од кои причини ги навредувал, бидејќи тие само си ја вршеле работата. Како одговор, наместо извинување, новинарската екипа добила дополнителни навреди!
Советот за етика во медиумите, Здружението на новинари како и Агенцијата за аудиовизуелни медиумски услуги веќе се известени за скандалот и се очекува нивна реакција.
ЦИВИЛ – Центар за слобода најостро го осудува скандалозното однесување на претставниците на локална власт во Општина Ново Село и повторно се залага за непречено функционирање на медиумските екипи при извршувањето на нивната професионална дејност.
Биљана Јордановска