Македонија ја интензивира соработката со земјите од регионот и очекува да стане 30-та членка на НАТО, изјави македонскиот премиер Зоран Заев, денеска во Подгорица, Црна Гора, каде што учествува на Самитот на земјите од Јадранската повелба со потпретседателот на САД, Мајк Пенс.
Заев во обраќањето на Самитот нагласи дека членството на Црна Гора во НАТО претставува охрабрување, бидејќи покажува оти сите можат да се издигнат и да придонест за колективните потреби, но и за потребите и интересите на своите граѓани.
„Очекуваме Македонија да стане 30-та членка на НАТО. Енергично работиме за соработка во регионот, се отвораме кон соседите. Вчера го потпишавме Договорот за добрососедство со Бугарија, а ја интензивираме соработката и со другите земји во регионот“, истакна Заев.
Овие чекори што ги презема новата Влада во Скопје, според него, треба да придонесат за развој на Македонија и на регионот. Македонскиот премиер изрази надеж дека тоа ќе го поттикне и забрза процесот на интеграција на Македонија во НАТО и во ЕУ. Заев најави дека Македонија во иднина поактивно ќе се вклучи во мисиите во НАТО и ќе го зголеми буџетот за одбраната.
Американскиот потпретседател ја потврди посветеноста на САД кон регионот, наспроти напорите на Русија за обновување на нејзиното историско влијание и врските со Западен Балкан.
„Верувам дека иднината на Западен Балкан е со Запад и се радувам што ќе работиме на јакнење на врските меѓу ЕУ, Балканот и САД. Пренесувам поздрави од американскиот претседател Доналд Трамп, како јасен знак на сојузништвото во рамките на НАТО. НАТО се состои од големи и мали држави, но САД немаат мали сојузници и ние го цениме нашето ново сојузништво во НАТО“, рече Пенс.
На Самитот на земјите од Јадранската повелба учествуваат и премиерите на Албанија – Еди Рама, на Хрватска – Андреј Пленковиќ, на Црна Гора – Душко Марковиќ и на Босна и Херцеговина – Денис Звиздиќ, како и на земјите-набљудувачи, Србија, претставена од премиерката Ана Брнабиќ, Косово – со претседателот Хашим Тачи и Словенија – со премиерот Миро Церар.
