На денешната прес-конференција која ЦИВИЛ Медиа директно ја пренесуваше, Бедредин Ибраими, член на Државната изборна комисија од ДПА, со собраниска одлука сменет со Ермира Асани од Беса, изјави дека објавувањето на јавен оглас за избор на еден член на ДИК е противзаконско!
„Петгодишниот мандадат ми е загарантиран со закон што е донесен пред дополнување и донесување на овие измени на Изборниот законик како на ‘Дивиот запад’…. Откако се убедија, особено редефинистите, дека мандатот ми е гарантиран со закон, преземаа конпромитирачки чекор за самите нив, потписниците на овој Предлог-закон и за законодавниот дом. Мојата оставка би значела согласување со крајниот, на вандалистички начин, донесен закон и со активностите на Беса и на другите субјекти што го потпишаа, а кои се умилкуваат на овој субјект за локалните избори“, рече Ибраими, додавајќи дека своето право ќе го брани со сите дозволени легални средства, во и вон земјата.
Ибраими се обрати и директно до претседателот на Собранието, Талат Џафери, читајќи го целосно неговото укажување и предлогот за ставање вон сила на одлуката за негова смена.
„За да ја донесете спорната одлука, најпрвин треба да донесете одлука за разрешување на член на ДИК и тоа само ако е исполнет еден од условите утврдени со член 28, став 1 од Изборниот законик“, изјави Ибраими
Понатаму, во неговото укажување до Собранието, Ибраими потенцира дека законодавниот дом ја прави првата повреда и изборна нерегуларност што лошо ќе одрази на финалниот извештај за локалните избори.
„Господине претседател, довербата што ви е дадена Вам и на другите пратеници на непосредни избори, ја злоупотребивте носејќи закони за еднократна употреба, а за злоупотреба се одговара“, се обрати директно Ибраими до Џафери.
На крај, и новинарските екипи беа искритикувани од Ибраими за наводно задоцнетата реакција, при што останаа без неговиот одговор на поставените прашања.
Биљана Јордановска
