Последен ден од предизборната кампања. Нешто старо, по нешто малку ново, многу „позајмено“, и ништо свежо. Од првиот, до последниот ден од кампањата.
Старо е тоа што го ветуваат сите, по нешто малку ново се некои од кандидатите, по нешто „позајмено“ – се програмите на кандидатите. Како да си ги позајмуваат еден на друг, па на моменти не ти текнува за која партија/кандидат се работи, промоција и ветувања на и за исти работи. Свежо, во смисла на некое освежување во вид на квалитетен кандидат со некоја свежа идеја, свеж изглед, свеж израз и свеж настап – нема(ше). Како и да е, во текот на средно-глупавите обиди за успешно, паметно, интересно, иновативно, креативно или достоинствено претставување на програмите, како и себепретставување, да ви кажам право, освен што се нервиравме, и доообро се изнасмеавме. Онака, на дневна основа, на речиси секоја изјава од ценетите ни кандидати.
Изградба и санирање на одводи, улици, патишта, мостови, зелени градови, чист воздух, велосипедски патеки, понекоја детска градинка, поправка или изградба на училишни покриви, културна ренесанса, започнати па заборавени проекти, нови проекти…ова се главните заложби и ветувања на кандидатите.
ВМРО -ДПМНЕ доживеа пресврт во својата реторика, почнаа да комуницираат и на друг јазик освен на македонски. Барем по билборди. Се задавивме од смеење.
Се случи најневеројатната коалиција, или соработка помеѓу две партии коишто за јавноста беа како мачка и глушец, или едната – трн во окото на другата, а другата, окото на третата, напуштената. СДСМ и ДУИ. Напуштената знаете која е. Додуша, соработката се случи многу порано, пред парламентарните избори на 11 декември 2016. Кога Али му фалимендеруваше на Зоки што го штедел во бомбите…Ама ете, како што некако кажа Али Ахмети – политика е ова. И така, ќе си ги поддржуваат кандидатите меѓусебно, а гласачите (оние нивните, традиционалните) во недела ќе се чувствуваат како заеднички носители на нов живот во Македонија, како што впрочем гласат нивните изборни слогани. Свечено и во духот на взаемна благодарност и почит. Секој на својата страна од Камениот Мост. И, што има тука ново? Ах, да, СДСМ во Арачиново. Се задавивме малку повеќе од смеење, па на крај дури и ни преседна.
Сигурно „ќе победат“, заедно!
Вечерва одржаа митинзи Беса и ВМРО – ДПМНЕ. Беса фала богу си ги собра кандидатите на едно место и конечно ја покажа својата кандидатка за градоначалничка на Град Скопје, којашто со својот говор ги засени другите кандидати на Беса за градоначалници на општини. Ништо чудно што не ја промовираа до вечерва. И дури сега ми стана јасна причината зошто ја немаше на јавните телевизиски дебати. Се спремала за завршниот митинг!
И да, „ ќе победат“!
А ВМРО-ДПМНЕ својот централен или како веќе го нарекуваат, завршен митинг го одржа пред Влада, со припреми од рано утро и блокирање на сообраќајот. По теркот на СДСМ пред неколку дена.
Не можев да следам што се случува на нивниот митинг, но од вечерашното следење на кампањата од моите колеги, дознав дека наеднаш пред Влада снемало струја, па митингашите направиле „ѕвездено небо“, и дека било многу романтично. Најверојатно и тие „ ќе победат“. Апсолутно романтично!
Таравари и Села сигурно ќе победат во Гостивар и Струга. Мислам, глупаво би било да не победат по нивното бегство од „Алкатразите“ им златни – Собрание и Министерство за Здравство. Ако не се премислат до 12 часот вечерва.
Кандидатите за Град Скопје. Не, вечерва нема да направам осврт за секој од нив поединечно. Само ќе констатирам дека жените меѓу нив заслужуваат сто пати поголема доверба и шанса на овие избори. А на овие избори, победата некако мириса на недозреано грозје, исклукано од жедни врапчиња во жешко лето. Со акцент на жеШко.
И за крај, сакам да им порачам на кандидатите и на нивните партии дека ние, потенцијалните и евентуалните гласачи, приближно знаеме каков ќе биде исходот од изборите. Не дека сме до толку интелигентни, туку дека вие сте предвидливи.
До следни избори!
https://www.youtube.com/watch?v=YFD2PPAqNbw
Дијана Тахири
